UBT-2022 taldaý: Qazaqtildi talapkerlerdiń nátıjesi joǵary

ASTANA. QazAqparat – Ǵylym jáne joǵary bilim mınıstrligi Ulttyq testileý ortalyǵy 2022 jylǵy negizgi Ulttyq biryńǵaı testileý nátıjelerine egjeı-tegjeıli taqyryptyq taldaý jasady, dep habarlaıdy QazAqparat.

UBT-2022 nátıjelerine taldaý mektepter, aýyldar, aýdandar, oblystar bólinisinde júrgizilgen. Sondaı-aq testilenýshilerdiń genderlik ereksheligi, tapsyrý tili jáne UBT pánderi boıynsha durys jaýaptarynyń sany men paıyzy anyqtalǵan.

Máselen, elimiz boıynsha durys jaýaptardyń paıyzy – 58% qurady. Eń jaqsy nátıje - «Oqý saýattylyǵy» páninen, suraqtardyń 82% durys jaýap berilgen. Odan keıingi oryndarda «Qazaq tili» - 64% jáne «Qazaq ádebıeti» - 60%.

Al eń az durys jaýaptar «Fızıka» jáne «Hımııa» pánderi boıynsha berilgen - tıisinshe 40% jáne 38%.

Genderlik taldaýǵa sáıkes, qyzdardyń (59%) nátıjeleri uldarǵa (57%) qaraǵanda joǵary bolǵan.

Qala balalary aýyldaǵy qurdastaryna qaraǵanda UBT-ny 3% jaqsyraq tapsyrǵan.

Oblystar boıynsha eń úlken aıyrmashylyq Qostanaı oblysynda baıqalady. Óńirde qalada turatyn balalardyń nátıjesi - 61%, aýyl balalarynyń nátıjesi 56% quraıdy. Bilimdegi eń az aıyrmashylyqty Qyzylorda oblysynyń túlekteri kórsetti - 0,4% qurady. Munda qala balalarynyń kórsetkishi - 63,8%, aýyl balalarynyń kórsetkishi - 63,4% boldy.

Testileýdi tapsyrý tili boıynshaqazaqtildi talapkerlerdiń nátıjeleri 0,4% artyq.

Sonymen qatar UBT-da tapsyrylǵan árbir pán boıynsha taqyryptyq taldaý jasaldy. Máselen, «Matematıka» páninen testileýdi qyzdar (55%) jaqsyraq tapsyryp, uldardan 47% basym nátıje kórsetti. Oqytý tili boıynsha kórsetkishter orys tilinde 51%, qazaq tilinde 49% qurady. Túlekter úshin eń kúrdeli taqyryp «Trıgonometrııalyq teńdeýler» boldy. Bul taqyryp boıynsha durys jaýaptardyń úlesi nebári – 35%. «Eki aınymalysy bar syzyqtyq teńdeýler júıesi. Eki aınymalysy bar syzyqtyq emes teńdeýler júıesi» taqyrybyndaǵy tapsyrmalardy jaqsy oryndap, 71% nátıje kórsetti.

«Óńirlerge jumys saparlary barysynda men oblystyq bilim basqarmalaryn osy derektermen tanystyramyn», - deıdi Ulttyq testileý ortalyǵynyń dırektory Rýslan Emelbaev.

Eske salaıyq, testileýge daıyndyq sapasyn arttyrý maqsatynda 2022 jylǵy naýryzda UTO testileý nátıjelerine jeke taqyryptyq taldaýdy engizdi. Emtıhan aıaqtalǵannan keıin túlekter durys jáne burys jaýaptarmen ǵana emes, sonymen qatar UBT nátıjeleriniń tolyq taldaýymen de tanysa aldy. ıAǵnı, testilenýshiler jeke taqyryptar boıynsha ózderiniń álsiz jaqtaryn anyqtady. Taldaý testileý aıaqtalǵannan keıin birden qoljetimdi bolyp, testilenýshiniń jeke kabınetinde saqtaldy.

Bul taldaý talapkerler úshin negizgi UBT-ny eki ret ótkizý barysynda erekshe mańyzǵa ıe. ıAǵnı emtıhannyń alǵashqy múmkindiginde testilenýshi ár pán boıynsha pándi meńgerý deńgeıin túsinip, qatelikter jiberilgen taqyryptardy qaıta tereńirek ıgere aldy. Osylaısha, UBT-nyń ekinshi múmkindiginde nátıjelerin jaqsartý múmkindigi boldy.