UBT-2018: Aýdıtorııalarǵa uıaly baılanys sıgnalyn tunshyqtyratyn jańa qondyrǵylar ornatyldy
Sáıkesinshe, barlyq aýdıtorııada 4G uıaly baılanys sıgnalyn tunshyqtyratyn jańa qondyrǵylar jumys isteıdi.
"Taǵy da eske salamyz, UBT-nyń durys jaýaptar kody memlekettik qupııa bolyp sanalady jáne ony taratqan adam qylmystyq jaýapkershilikke tartylady. Osyǵan baılanysty, barlyq túlekterden bekitilgen erejelerden attamaýyn suraımyz", - dedi Ulttyq testileý ortalyǵynyń dırektory Ramazan Álimqulov Ortalyq kommýnıkatsııalar qyzmetinde ótken baspasóz máslıhatynda.
Sonymen birge, ortalyq basshysy testileýge tyıym salynǵan zattarmen, ásirese uıaly telefonmen kiretin túlekterdiń bar ekenin de jasyrmady.
"Iá, ondaı jaǵdaılardyń bar ekenin jasyrmaımyz. Biraq, bıyl UBT ótetin aýdıtorııalardyń tehnıkalyq jabdyqtary 100% jańartyldy. Sáıkesinshe, barlyq aýdıtorııada 4G uıaly baılanys sıgnalyn úzetin jańa qondyrǵylar jumys isteıdi. Sondyqtan, mektep túlekteri UBT-da túrli qıturqy áreketke ýaqyt joǵaltqansha, óz bilimine ǵana sengeni jón. Beriletin 3 saǵat 50 mınýtty tıimdi paıdalanyp, memlekettik grantqa jetetin baldy ózderi jınaǵany abzal", - dedi R. Álimqulov.
Aıta keteıik, Ulttyq biryńǵaı testileý bıyl 15-shi ret uıymdastyrylady. Erteń oqýshylardyń alǵashqy legi synaqtan ótedi jáne sońǵy lek testileýdi 1 shildede aıaqtaıdy.
Bıyl UBT-ǵa respýblıka boıynsha 102 myńy qatysady. Onyń 75,4% nemese 77 243 túlek testileýdi qazaq tilinde, 25 178 túlek (24,6%) - orys tilinde jáne 46 túlek - aǵylshyn tilinde tapsyrady.