UBT 2017 jyly ákimder men mektepter reıtıngisinen ketedi - E.Saǵadıev
ASTANA. QazAqparat - Ulttyq biryńǵaı testileý 2017 jylǵa qaraı ákimder men mektepter reıtınginen ketip, maǵynaly testileýge transformatsııalanady. Bul týraly búgin Ortalyq kommýnıkatsııalar qyzmetinde ótken brıfıngte QR Bilim jáne ǵylym mınıstri Erlan Saǵadıev málim etti.
«UBT áleýmettik fýnktsııalarmen júktelgen. Biz ony jaqsy túsinemiz. Degenmen, ustazdar men mektep dırektorlaryna aıtarym: 2017 jyly UBT ákimder men mektepter reıtınginen ketedi. Osy UBT úshin ustazdarǵa qysym kórsetpeńizder deımin», - dedi mınıstr.
Onyń aıtýynsha, endigi UBT máni de maǵynasy da ózgeriske ushyraıdy. «Ol maǵynaly bolady. Mektepte oǵan daıyndalý úshin zııatkerlik deńgeıin kóterý qajet. Sondyqtan, oqýshylardy 9-shy synyptan keıin kolledjderge qýýdyń qajeti joq. Kolledjderge túsý úshin UBT-ny tapsyrýdyń qajeti bolmaıdy. Óıtkeni, kolledjderge 9-shy jáne 11-synyptan keıin túsýge jaǵdaı jasalady. Endi biz kolledj ben mektepten keıingi jaǵdaıdy teńestirýdi josparlaýdamyz. Olardyń bári de UBT tapsyrady», - dedi vedomstvo basshysy. Onyń aıtýynsha, UBT-nyń negizgi áleýmettik mıssııasy - memlekettik granttardy úlestirý. Mınıstrdiń paıymynsha, eger memlekettik granttar JOO-laryna beriletin bolsa, sáıkesinshe bilim berýge bólingen memlekettik qarajatqa memleket tarapynan baqylaý bolmaıdy.
«Meniń oıymsha, UBT óziniń tarıhı mıssııasyn óte jaqsy oryndaı alady ári osyndaı emtıhan bolýy tıis. UBT ótkizýdiń quny osy bilim granttarynyń shamamen 3,5% quraıdy, sondyqtan memleket osy qarajatty ádiletti jáne tıimdi úlestirý úshin 3,5% jumsaıdy», - dedi ol.
