UBT-2015 suraqtarynyń 25-30 paıyzy jańartyldy - Bilim mınıstrligi
ASTANA. QazAqparat - Ulttyq biryńǵaı testileýdiń negizgi pánderi boıynsha suraqtar bazasy 25-30 paıyzǵa jańartyldy. Bul týraly QR Bilim jáne ǵylym mınıstrligi Bilim jáne ǵylym salasyndaǵy baqylaý komıteti "QazAqparat" agenttiginiń resmı saýalyna bergen jaýabynda habarlady.
QR BǴM málimetteri boıynsha, bıyl testik tapsyrmalardyń bazasy 21 300 suraqpen tolyqqan. Testte eń kóp tańdalatyn pánderdiń ishinde fızıka, bıologııa men geografııa kósh bastap keledi. Sondyqtan UBT-2015 fızıka páni boıynsha synaq suraqtary 35 paıyzǵa, bıologııa boıynsha - 30 paıyzǵa, geografııa boıynsha 30 paıyzǵa jańartyldy.
"Aǵylshyn, dúnıejúzi tarıhy, hımııa eń az tańdalatyn pánder. UBT-2015 naýqany qarsańynda dúnıejúzi tarıhy páni boıynsha synaq suraqtary 27 paıyzǵa, hımııa boıynsha - 21 paıyzǵa, aǵylshyn tili boıynsha 20 paıyzǵa jańartyldy. Sonymen birge nemis, frantsýz tilderi jáne qazaq pen orys ádebıetteri pánderi boıynsha suraqtar 7-8 paıyzǵa óńdeldi. Sebebi bul pánderdi túlekterdiń tek 2-4 paıyzy tańdaıdy. Jalpy mindetti pánder boıynsha suraqtar 25-30 paıyzǵa jańardy", - delingen habarlamada.
Jańa suraqtardy aldyn ala synaqtan ótkizý úshin respýblıkanyń 75 mektebinen 3500 oqýshy qatysty.
2015 jyly alǵash ret 12 jyldyq mektep baǵdarlamasyn támamdaǵan 341 túlek UBT-ǵa qatysady. Olardyń 236-sy - qazaq, 105-i orys tilderinde tapsyrady.
UBT-2015 elimizdiń 165 pýnktinde ótýde. Olardyń 116-sy aýdan ortalyqtaryndaǵy mektepterde ornalassa, 49 pýnkt - oblys ortalyqtarynda, sondaı-aq Astana men Almaty qalalarynda.
"Bıyl UBT ótkizýge bıýdjetten 1 022 806 myń teńge bólindi", - dep atap ótti mınıstrlikten.
Eske sala keteıik, Qazaqstanda Ulttyq biryńǵaı testileý 2 maýsymda bastaldy. Osy jyly synaqqa 87 782 túlek qatysýda. Bul - jalpy mektep bitirýshilerdiń 71 paıyzy. Ulttyq testileý ortalyǵynyń málimetteri boıynsha, testide úsh kúnde 125 ball jınaǵan 4 túlek anyqtaldy: Gúlnáz Erdosova (Taraz), Rıana Mustafına (Astana), Laýra Abdazımova (OQO, Túlkibas aýdany) jáne Symbat Samat (Oral).
