UBT: 140-tan 139 ball alǵan qostanaılyq túlek muǵalim mamandyǵyn tańdady
QOSTANAI. KAZINFORM – Qostanaı qalasyndaǵy M.Kóbeev atyndaǵy jalpy bilim beretin mekteptiń oqýshysy Janel Tansyqpaeva naýryzdaǵy Ulttyq biryńǵaı testileýde jalpy 140 baldan 139 ball jınady. Bul týraly Oqý-aǵartý mınıstrligi habarlady.
– Janeldiń joǵary jetistigi kezdeısoqtyq emes, basqa túlekterge úlgi bola alatyn sanaly kózqarastyń jemisi, júıeli daıyndyqtyń nátıjesi. Shákirttiń tabysynyń basty faktorlarynyń biri halyqaralyq IELTS emtıhanyna sapaly daıyndyq boldy, – dep jazdy mınıstrliktiń baspasóz qyzmeti.
7.0 ball alǵan sertıfıkat oǵan beıindik pán boıynsha eń joǵary baldy avtomatty túrde rastaýǵa múmkindik berdi. Bul til quzyrettilikterin jalpy oqý baǵdarlamasyna kiriktirýdiń mańyzdylyǵyn taǵy bir ret dáleldeıdi.
Kez kelgen salaǵa jol ashatyn eń joǵary nátıjege qaramastan, Janel pedagogıka mamandyǵyna túsýdi sheshipti.
– Meniń maqsatym jaı ǵana bilim berý emes, balalardy shabyttandyrý. Meni bir kezde alǵashqy muǵalimim Torǵyn Ibragımova shabyttandyrǵan edi, – dep atap ótedi túlek.
Janeldiń tańdaýy daryndy jastar arasynda pedagog mamandyǵy bedeliniń artyp kele jatqanyn kórsetedi. Qazir túlek memlekettik grantqa konkýrsta óz nátıjesin rastaý úshin UBT-nyń negizgi kezeńine daıyndalyp jatyr.
Aıta keteıik, semeılik oqýshy Erasyl Saılaýov Naýryz UBT-dan 140 ball alyp, elimiz boıynsha eń joǵary kórsetkishke ıe boldy.
