UBQ «Hıýston» klýby satylymǵa qoıyldy, ony 1,65 mlrd dollarǵa baǵalaýda
ASTANA. QazAqparat - Ulttyq basketbol qaýymdastyǵynyń «Hıýston» klýby satylymǵa qoıyldy. Bul jaıly klýb prezıdenti Ted Braýnǵa silteme jasaǵan ESPN telearnasy habarlaıdy.
«Klýb ıesi Leslı Aleksander «Hıýstondy», sondaı-aq kásibı jáne jartylaı kásibı sporttyq klýbtardy basqarý jónindegi "Klatch Sıtı Sports end Enterteınment" (Clutch City Sports and Entertainment) kompanııasyn satylymǵa qoıdy», - dedi Braýn. Ol 1993 jyldan beri klýbqa ıe bolyp kele jatqan Leslı Aleksanderge birneshe jyldar boıy klýbty satý jóninde túrli usynystar kelip túskendigin jáne onyń sońǵy sátterge deıin bulardy qarastyrmaǵandyǵyn málim etti.
ESPN telearnasynyń atap ótýinshe, klýbqa tek AQSh-tyń ǵana emes, Azııa elderiniń ınvestorlary da qyzyǵýshylyq tanytýy múmkin. Klýbtyń qazirgi ıesi ony 85 mln dollarǵa satyp alǵan, bıylǵy jyly Forbes jýrnaly «Hıýstondy» 1,65 mlrd dollarǵa baǵalaǵan bolatyn.
