Uber, Yandex pen InDriver qyzmetteri zańmen retteledi - vıtse-mınıstr Sklıar
ASTANA. QazAqparat - QR Investıtsııalar jáne damý vıtse-mınıstri Roman Sklıardyń aıtýynsha, jańa zań jobasynyń aıasynda ǵalamtor arqyly taksı qyzmetin júrgizetin kompanııalardyń jumysyn retke keltirý josparlanǵan. Negizgi maqsat - jolaýshylardyń qaýipsizdigin qamtamasyz etý, dep habarlaıdy QazAqparat tilshisi.
"Ǵalamtor arqyly taksı qyzmetin júrgizetin kompanııalar kimmen jumys jasap jatqanyn bilmeıdi. Jelige qosylǵan kólik júrgizýshisi medıtsınalyq tekseristen ótti me, kóliktiń texnıkalyq jaǵdaıy qandaı, ony kompanııa da, kólikke otyrǵan jolaýshy da bilmeıdi. Bálkim, onyń júrgizýshisi kýáliginiń merzimi de ótip ketken shyǵar. Ondaı qyzmetter kezinde kólik júrgizýshisiniń jasy da eskerilmeıdi. Ol 18 jasqa endi ǵana tolǵan shyǵar. Al zańǵa sáıkes, jolaýshylar tasymalymen 22 jastan bastap aınalysýǵa bolady. Sondyqtan biz osy máseleni zańǵa engizip, Uber, Yandex pen InDriver sııaqty ǵalamtor arqyly taksı qyzmetin júrgizetin kompanııalardyń jumysyn retke keltirýdi kózdeımiz", - dedi Sklıar zań jobalaý qyzmeti máseleleri jónindegi vedomstvoaralyq komıssııanyń búgingi otyrysynda.
Vıtse-mınıstrdiń aıtýynsha, mınıstrlik xalyqaralyq kompanııalardyń qyzmetin shekteýdi kózdep otyrǵan joq. Búginde barlyǵy birdeı zań talaptaryn oryndaýǵa tıis. Qazaqstanda resmı túrde tirkelgen taksı qyzmetteri ol talaptardy oryndap keledi.
