Uber, InDriver men ıAndeks Taksı: Qazaqstanda 50 myń taksıshini qalaı zańdastyrady
ASTANA. QazAqparat - QR Investıtsııalar jáne damý mınıstrligi elektrondy taksı qyzmetterin qalaısha zańdastyratynyn túsindirdi, dep xabarlaıdy QazAqparat tilshisi.
Kólik komıtetiniń tóraǵasy Áset Asavbaevtyń aıtýynsha, Uber, InDriver men ıAndeks Taksı sııaqty mobıldi qosymshalar boıynsha adam tasıtyn kólik quraldary kóp jaǵdaıda texnıkalyq talaptarǵa saı kelmeıdi. Buǵan deıin mınıstrlik atalǵan komanııalarmen kelissóz ótkizip, kólik júrgizýshilerimen kelisimshartqa otyrýdy talap etken. Alaıda qazirgi zańnama boıynsha taksı-motorlyq qyzmetti kórsetý úshin eskertý xat berilse de jetkilikti.
«Olar osyny paıdalanyp, emin-erkin adam tasyp júr. Osyǵan baılanysty biz ǵalamtor arqyly taksı qyzmetin zańdastyryp, tıisti normatıvtik qujattarǵa ózgeris engizip otyrmyz. Endi, naqty reglament bolady. Kompanııalar árbir kólik júrgizýshini teksere alady. Kólik quralynyń texnıkalyq tekserisi bar ma, joq pa, ony da talap ete alady», - dedi Á.Asavbaev Parlament Májilisinde arnaıy zań jobasyn tanystyrý kezinde.
Mınıstrliktiń málimetine sáıkes, mobıldi taksı qyzmetterin zańdastyrýdyń nátıjesinde 50 myń taksıshi «kóleńkeden» shyǵady.
Aıta keteıik, Parlament Májilisiniń depýtattary kólik máseleleri boıynsha keıbir zańnamalyq ózgeristerdi talqylaýǵa kiristi. Sonyń ishinde respýblıkalyq joldarda kólik quraldaryn jappaı toqtatý tájirıbesine tyıym salý máselesi de bar.
