Uber-diń bas dırektory qyzmetinen aıyrylýy múmkin
ASTANA. QazAqparat - Uber kompanııasynyń negizin qalaýshy jáne bas dırektory Trevıs Kalanık ýaqytsha qyzmetinen shettetilýi nemese basqa laýazymǵa aýystyrylýy múmkin, dep habarlaıdy TASS agenttigi.
Basylymnyń habarlaýynsha, jeksenbi kúni Uber dırektorlar keńesi kezdesý ótkizip, onda Kalanık pen onyń eki orynbasarynyń bolashaǵyn talqylady. Uber basshysynyń orynbasary Emıl Maıkl jaqyn kúnderi qyzmetinen bosatylýy ábden múmkin. Kalanıktyń operatsııalar jónindegi orynbasary Raıan Greıvstiń mansabyna da qaýip tóndi.
Dırektorlar keńesiniń mundaı áreketi - Uber qyzmetkerleriniń qatysýymen bolǵan daý-damaıǵa baılanysty boldy. Kompanııanyń basshylyǵy, ásirese, menedjerlerdiń birine qatysty taǵylǵan aıyppen kelispedi. Onyń Úndistanda Uber júrgizýshisi zorlyq jasaǵan qyzǵa qatysty medıtsınalyq derekterdi alǵany habarlandy. Budan bólek, osy oqıǵa saldarynan kompanııanyń 20 qyzmetkeri jumystan bosatyldy. Aqpan aıynda Uber kompanııasynyń burynǵy eki qyzmetkeri ózderiniń burynǵy basshylyǵyn seksızm men alymsaqtyq jasady dep aıyptaǵan edi. Kalanık budan keıin kompanııada muqııat tekseris júrgizýge ýáde etken bolatyn.
