UB tóraǵasy: Basty maqsat — ınflıatsııany bir tańbaly mánge qaıtarý
ASTANA. KAZINFORM — Strategııalyq mańyzy bar jobalardy ǵana qarjylandyrý qajet. Bul týraly Senattyń jalpy otyrysynda Ulttyq bank tóraǵasy Tımýr Súleımenov aıtty.
— Inflıatsııany turaqtandyrýdaǵy mańyzdy faktor — fıskaldyq konsolıdatsııa. Ulttyq qordan bólinetin transfertterdi 2,8 trln teńge deńgeıinde shekteý — mańyzdy dezınflıatsııalyq faktor. Endi respýblıkalyq bıýdjettiń konsolıdatsııasyn is júzinde iske asyrǵan jón. Úılestirýdiń taǵy bir baǵyty — ekonomıkany qarjylandyrý baǵdarlamasyn sapaly iske asyrý. Bizdiń oıymyzsha, strategııalyq mańyzy bar jobalardy ǵana qarjylandyrý qajet. Baǵdarlamanyń maqsaty — shıkizatqa jatpaıtyn salalarda qosylǵan qundy arttyrý. Іshki naryqta otandyq taýarlarǵa usynystyń ósýi ınflıatsııanyń tómendeýine oń yqpal etýge tıis, — dedi Tımýr Súleımenov Úkimettiń ótken jylǵy respýblıkalyq bıýdjettiń atqarylýy týraly esebin talqylaý barysynda.
Onyń aıtýynsha, Ulttyq bank pen Úkimettiń bıylǵa josparlanǵan basty maqsaty — ınflıatsııany bir tańbaly mánge qaıtarý.
— Negizgi quraly — Makroekonomıkalyq turaqtandyrý jáne halyqtyń ál-aýqatyn arttyrý jónindegi 2026-2028 jyldarǵa arnalǵan Úkimettiń, Ulttyq bank pen Qarjy naryǵyn retteý jáne damytý agenttigi birlesken is-qımyl baǵdarlamasy jáne Inflıatsııany baqylaý men tómendetý sharalarynyń kesheni, — dedi Ulttyq bank tóraǵasy.
Aıta keteıik, 2025 jyly elimizdiń altyn-valıýta rezervteri 42,8 paıyzǵa ósti.
