UB: Teńgemen salymdardyń údemeli ósimi baıqalýda
ASTANA. QazAqparat - Qazaqstanda teńgemen salymdardyń údemeli ósimi baıqalýda. Bul týraly búgin Parlament Májilisiniń jalpy otyrysynda QR Ulttyq bank tóraǵasy Danııar Aqyshev málim etti. Májilismender «2017-2019 jyldarǵa arnalǵan respýblıkalyq bıýdjet týraly» zań jobasyn talqylaýda, dep habarlaıdy QazAqparat.
«Qazaqstanda teńgemen aktıvterge jáne depozıtterdiń dollarlanýynyń tómendeýine degen senimniń qalpyna kelýiniń jaǵymdy úrdisteri baıqaldy. Halyqtyń jáne kásiporyndardyń valıýtaǵa basymdyq berýi ózgerýde, teńgemen salymdardyń údemeli ósýi baıqalýda», - dedi Danııar Aqyshev.
Buǵan kóbine Ulttyq banktiń teńgemen quraldar tartymdylyǵyn arttyrý jónindegi sharalary yqpal etti. Belgili bolǵandaı, jeke tulǵalardyń ulttyq valıýtadaǵy depozıtteri boıynsha eń joǵarǵy mólsherlemeler 2016 jylǵy aqpanda 10%-dan 14%-ǵa deıin kóterildi jáne shetel valıýtasyndaǵy depozıtter boıynsha mólsherlemeler 3%-dan 2%-ǵa deıin tómendetildi.
Taratylǵan málimetterge qaraǵanda, qyrkúıektiń qorytyndysy boıynsha shetel valıýtasyndaǵy depozıtter úlesi 2016 jylǵy qańtardan bastap 70%-dan 58,3%-ǵa deıin, onyń ishinde halyqtiki 80%-dan 66,6%-ǵa deıin, zańdy tulǵalardiki 62%-dan 52,5%-ǵa deıin tómendedi.
