UB: Saqtandyrý ombýdsmeni ókilettigi keńeıtiledi
ASTANA. QazAqparat - Qazaqstanda saqtandyrý ombýdsmeniniń ókilettigin keńeıtý josparlanyp otyr. Búgin Májilistiń Qarjy jáne bıýdjet komıteti men «Nur Otan» partııasynyń Májilistegi fraktsııasy janyndaǵy Ekonomıkalyq saıasat jónindegi keńestiń dóńgelek ústel otyrysynda QR Ulttyq bank tóraǵasynyń orynbasary Janat Qurmanov osylaı málim etti, dep habarlaıdy QazAqparat.
Jıyn barysynda depýtattar «Qazaqstan Respýblıkasynyń keıbir zańnamalyq aktilerine saqtandyrý jáne saqtandyrý qyzmeti máseleleri boıynsha ózgerister men tolyqtyrýlar engizý týraly» zań jobasyn talqylady.
«Qazaqstanda saqtandyrý ombýdsmeniniń ońtaıly tájirıbesin eskere otyryp, zań jobasynda saqtandyrýdyń barlyq sanattaryna onyń ókilettigin keńeıtý qarastyrylǵan. Sonymen qatar taraptardyń sotqa júginý quqyǵy saqtalady. Aıta keteıik, ombýdsmen naryqta 10 jyldan astam ýaqyttan beri jumys istep keledi. Bul turǵyda bizde jaqsy tájirıbe bar, ıaǵnı saqtandyrý ombýdsmeni saladaǵy daýlar boıynsha, kólik quraldary ıeleriniń azamattyq-quqyqtyq jaýapkershiligin mindetti saqtandyrý boıynsha máselelerdi sheship keledi. Osylar Qazaqstandaǵy mindetti saqtandyrýdyń keń taraǵan túri. Zań jobasynda ombýdsmenniń qyzmeti salasyn keńeıtý qarastyrylǵan. Jeke tulǵalardyń ári shaǵyn kásipkerlik sýbektileriniń daýlary ombýdsmenniń qatysýymen sheshiletini eskerilgen», - dedi Janat Qurmanov.
UB tóraǵasy orynbasarynyń sózine qaraǵanda, Qazaqstanda saqtandyrý ombýdsmeniniń jumysy barysynda onyń qaraýyna kólik ıeleriniń azamattyq-quqyqtyq jaýapkershiligin mindetti saqtandyrý boıynsha eki myńǵa jýyq ótinim kelip túsken. Onyń sheshiminiń tek bir paıyzy ǵana sotta qaralǵan.
«ıAǵnı ombýdsmen sheshimderi aıtarlyqtaı kásibı deńgeıde bolǵanyn baıqap otyrmyz. Osy oraıda sotqa deıingi retteý ınstıtýty kúsheıtilýi tıis dep oılaımyz. Munyń arqasynda sotqa júginetinder aıtarlyqtaı azaıady», - dedi ol.
