UB basshysy teńgeniń aıyrbas baǵamyna qatysty táýekelderdi aıtty
ASTANA. QazAqparat - Búgin Parlament Májilisiniń jalpy otyrysynda QR Ulttyq bank tóraǵasy Danııar Aqyshev teńgeniń aıyrbas baǵamyna qatysty túsinik berdi, dep habarlaıdy QazAqparat.
«Ulttyq bank shekarasy, dálizi nemese basqa da baǵdary joq ózgermeli aıyrbas baǵamy saıasatyn jalǵastyrady. Valıýta baǵamy negizinen elimizdegi tólem balansy jaǵdaıyna baılanysty, ıaǵnı shetel valıýtasynyń elimizge túsimi men jylystaýynyń teńgerimi áserinen qalyptasatynyna senimdimiz. Bul syrtqy kúızelisterdi azaıtýǵa jáne ekonomıkamyzdyń básekege qabilettilik kórsetkishterin dereý túzetýge múmkindik beredi», - dep toqtaldy UB basshysy «2019-2021 jyldarǵa arnalǵan respýblıkalyq bıýdjet týraly» zań jobasyn talqylaý kezinde.
Aldyn ala derekter boıynsha 2018 jyldyń 9 aıynda tólem balansynyń aıtarlyqtaı jaqsarýy baıqaldy. Ótken jyly 4,6 mlrd dollardy qurǵan aǵymdaǵy shot tapshylyǵy 0,9 mıllıard dollarǵa nemese 5,4 esege deıin tómendedi.
«2018 jyldyń úshinshi toqsanynda aǵymdaǵy shot tapshylyǵy tek 0,1 mlrd AQSh dollaryn qurady, bul sońǵy jyldarǵy eń jaqsy kórsetkish.
Aldaǵy jyldardaǵy aǵymdaǵy shot tapshylyǵy kóleminiń tómendeý úrdisi kútilýde, bul ulttyq valıýta turaqtylyǵyna jaǵymsyz faktorlardy barynsha azaıtýǵa múmkindik beredi. Aıyrbas baǵamy boıynsha qysqa merzimdi táýekelderge toqtalsaq, jahandyq qarjy naryqtaryndaǵy belgisizdik jáne negizgi saýda áriptes elderiniń valıýta baǵamdary jaǵdaıynyń nasharlaýy bolyp qalady», - dedi D. Aqyshev.
Belgili bolǵandaı, jyldyń basynan 30 qazanǵa deıin valıýta naryǵynda teńge baǵamy 10,9 paıyzǵa álsiredi jáne bir AQSh dollary úshin 368,55 teńgeni qurdy.
«Bul aıyrbas baǵam saıasaty valıýtalyq rezervterdi saqtaýǵa múmkindik beredi. Qyrkúıektiń sońynda Ulttyq banktiń altyn-valıýta rezervteri 30 mlrd AQSh dollaryn, Ulttyq qordyń aktıvteri - 56,3 mlrd AQSh dollaryn qurady. Halyqaralyq rezervterdiń jalpy kólemi 86,3 mlrd AQSh dollaryna jetti», - dedi ol.
Budan buryn habarlanǵandaı, bazalyq stavkanyń jańa deńgeıi teńge aktıvterine suranysty arttyrady.
