UB: 2025 jylǵa arnalǵan ınflıatsııanyń medıandyq boljamy — 10,7 paıyz
ASTANA. KAZINFORM — Aldaǵy jyly kútiletin ınflıatsııa 14,1 paıyzdy quraıdy. Bul týraly Ulttyq bank tóraǵasy Tımýr Súleımenov aıtty.
— Mamyr aıynyń qorytyndysy boıynsha jyldyq ınflıatsııa 11,3 paıyzǵa jetti. Inflıatsııanyń qarqyny ótken jyldyń sońynan beri baıqalyp keledi. Baǵaǵa qysym kórsetýshi negizgi faktor — qyzmet kórsetý salasy. Jyldyq mánde servıstik komponent 16 paıyzǵa ósti. Sonymen qatar, eger I-toqsanda servıstik ınflıatsııanyń negizgi ósimine retteletin turǵyn úı-kommýnaldyq qyzmetteri úles qosqan bolsa, II-toqsannan bastap aldyńǵy qatarǵa naryqtyq qyzmetter shyǵa bastady, — dedi ol.
Onyń atap ótýinshe, retteletin turǵyn úı-kommýnaldyq qyzmet tarıfteriniń jyldyq ósimi 25,8 paıyzdy qurady. Rettelmeıtin naryqtyq qyzmetter de 14,7 paıyzǵa qymbattady. Rettelmeıtin qyzmet túrlerine baǵalardyń tez ósýi ishki suranystyń joǵary ekenin aıǵaqtaıdy. Sebebi bul qyzmetter memleket tarapynan rettelmeıdi jáne suranys tarapynan qosymsha teńgerimsizdikke ushyraıdy.
— Servıstik ınflıatsııa baǵasynyń jedel ósýimen qatar azyq-túlik ınflıatsııasynyń baǵasy da kóterilip keledi. Mamyr aıynda ol 9,6 paıyzdy qurady. Bul, eń aldymen, aýyl sharýashylyǵy ónimderiniń birtindep qymbattaýymen baılanysty. Azyq-túlik baǵasynyń ósýine kýrstyq faktor da áser etti: ımporttyq, ásirese, TMD elderinen keletin taýarlardyń kóterme baǵasy da ósip tur. Jaqsy jańalyqtan — bazalyq ınflıatsııa mamyr aıynda 0,8 paıyzdy qurady. Al maýsymdyq faktordy eskermegendegi ınflıatsııa 0,9 paıyz boldy. Osy faktorlardyń kórsetkishi birneshe aı turaqty bolyp, keıin azdap tómendegenin kórsetti. Aldaǵy jyly kútiletin ınflıatsııa 14,1 paıyzdy qurady. Bul baǵalaýlarda janar-jaǵarmaı baǵasynyń ósýi men QQS-tyń josparlanǵan arttyrýy kórinis tapqan. Naryqtyń kásibı qatysýshylary birshama ustamdy bolǵanymen, 2025 jylǵa arnalǵan ınflıatsııanyń medıandyq boljamy 10,7 paıyzdy quraıdy, — dedi Ulttyq bank tóraǵasy.
Buǵan deıin Tımýr Súleımenov krıptovalıýtaǵa ınvestıtsııa salýǵa qatysty pikir bildirgen edi.