Ýaılder - Ortıs. Van Dammnyń «stsenarıimen» ótken jekpe-jek
ASTANA. QazAqparat - Kásipqoı boks áleminiń «qubyjyǵy» Deonteı Ýaılder búgin Brýklınde óz karerasyndaǵy eń aýyr jekpe-jekteriniń birin ótkizip, kýbalyq «Kıng-Kong» Lýıs Ortısti nokaýtpen jeńdi, dep xabarlaıdy "SPORTINFORM" SAA.
«Showtime» telearnasynyń uıymdastyrýymen ótken Nıý-Iorktiń mańyndaǵy Brýklın qalashyǵynda ótken kásipqoı boks keshiniń basty jekpe-jeginde, shyny kerek, mamandar men jankúıerlerdiń kópshiligi kýbalyqtyń jeńisine senimdi bolǵan. Ekeýi de óz ǵumyrynda jeńilistiń kermek dámin tatyp kórmegen boksshylar bolǵanymen, nege ekeni belgisiz, Amerıkada Ýaılderdiń ónerin baǵalaıtyndar az. Joly bolǵysh esepteı me, áıteýir kópshiligi onyń statıstıkasyna kúmánmen qaraıdy. Áıtpese, Ortıske deıin 39 jekpe-jek ótkizip, barlyǵynda jeńiske jetken alyp qoı. Bul joly da jankúıerlerdiń basym bóligi kýbalyqtyń jeńisine senimdi boldy. «Naǵyz myqtyǵa endi kezikti, jeńiledi» desti sharshy alańnyń tóńireginde júrgen mamandar. Al salmaq ólsheý rásiminde «Kıng-Kong» Ýaılderden tup-týra 12 kelige aýyr bolyp shyqty. ıAǵnı, 97,4 - 107,4 keli. Degenmen, «Qubyjyqtyń» ózi jeńisine senimdi edi.
«Sońǵy kezderi barlyq jerde kózime 3 degen san qaıta-qaıta túse beretin bolyp júr. Ortısti úshinshi raýndtan asyrmaımyn», - dedi jekpe-jek aldyndaǵy baspasóz máslıhatynda Ýaılder.
Biraq, besinshi raýndqa deıin boksshylar bir-birin ańdysýmen boldy. Al altynshy raýndtan bastap Ortıs aıqas tizginin óz qolyna aldy da, qarsylasyn tópeleı jóneldi. Bas kótertpeı tastady. «Bitken jeri osy ǵoı», - dep biz de oıladyq. Qulaýǵa shaq júrdi. Ábden sharshady. Alaıda, qarsylasyn da sharshatty. Jekpe-jektiń 10-shy raýndynda, quddy bir, Jan-Klod Van Dammnyń kınolaryndaǵydaı, ekinshi tynysy ashylǵan Ýaılder «Kıng-Kongqa» birneshe aýyr soqqy jumsap, jerge etpetinen qulatty. Ortıs ornynan kóterilgenimen amerıkalyqtyń kezekti aýyr soqqysynan keıin sespeı qatty.
«Ózimniń naǵyz chempıon ekenimdi dáleldedim. Kez kelgen soqqyny kóterip, aıqastyń taǵdyryn óz paıdama sheshe alatynymdy kórsettim», - dedi jekpe-jekten keıin Deonteı Ýaılder.
Iá, rasymen de Ortıstiń álgindeı aýyr soqqylaryna shydaǵan Ýaılder rasymen de myqty eken. Degenmen, brıtandyq Entonı Djoshýamen kezdesse, qalaı bolar eken? Qansha degenmen, Djoshýanyń fızıkasy Ortıstikinen áldeqaıda jaqsy ǵoı. Bul jekpe-jekti aldaǵy bir-eki jylda kórip te qalatyn sekildimiz.
