Ýálıhan Bısenqulov Máskeýde synǵan qolmen aıqasyp, qarsylasyn nokaýtqa túsirdi

ASTANA. QazAqparat - Ýálıhan «Adaı» Bısenqulovtyń qarsylasy qyrǵyzstandyq boksshy Ernıs Saıpıdınýýlý boldy. Bul aıqastyń qalaı ótkendigi jaıly jańaózendik boksshynyń menedjeri jáne bapkeri Jalǵash Tókeshov aıtty, dep habarlaıdy lada.kz.

Jekpe-jek 15 jeltoqsan kúni keshkisin Lýjnıkıdegi Boks akademııasynda Shamo Boxing Promotions ben Tukeshov boxing promotions qoldaýymen ótti.

Jalǵas Tókeshov atap ótkendeı, birinshi raýndta Ýálıhan upaı boıynsha jeńgen. Ekinshi raýndta ol qarsylasynyń baýyrynan soqqy berip, nokaýtqa túsirgen.

Ýálıhan Ernıs Saıpıdınýýlýmen ekinshi ret kezdesip otyr. Olardyń birinshi aıqasy 15 qyrkúıekte ótken. Ol kezde qazaqstandyq boksshy tehnıkalyq nokaýtpen jeńiske jetken edi. Keıin qyrǵyzstandyq revansh suraǵan.

«Eń qyzyǵy, ol aıqasta sol qolymen jeńdi. Sebebi, onyń oń qoly synyp, bir aı buryn ǵana gıpsin alǵan bolatyn. Biz jyldyń sońynda óner kórsetip, rekord jasamaqshy boldyq. Kelesi jylǵa josparlar kóp. Qazir sheteldik promoýterlik kompanııalarmen kelissózder júrgizilip jatyr», - dep bólisti boksshynyń menedjeri jáne bapkeri.

Ýálıhan Bısenqulov rıngke 23 aqpanda shyǵyp, kásibı rıngtegi toǵyzynshy jekpe-jegin Aqtóbede ótkizedi. Bul tıtýldyq aıqas bolmaq.