Ýálı Qydyr Túrkistan telearnasynyń bas dırektory boldy

TÚRKІSTAN. KAZINFORM – Jýrnalıstıka salasynda uzaq jyldyq tájirıbesi bar Ýálı Qydyr «Turkistan Media Holding» jaýapkershiligi shekteýli seriktestiginiń bas dırektory bolyp taǵaıyndaldy. Jańa basshyny ujymǵa Túrkistan oblysy Qoǵamdyq damý basqarmasynyń basshysy Erlan Kúzembaev tanystyrdy.

Ýálı Qydyr 1975 jyly Túrkistan oblysy Otyrar aýdanynda dúnıege kelgen. Ál-Farabı atyndaǵy Qazaq ulttyq ýnıversıtetiniń jýrnalıstıka fakýltetin bitirgen.

Eńbek jolyn «Zań» basylymdarynda redaktor bolyp bastady. 2001 jyly QR Joǵarǵy sotynyń baspasóz qyzmetinde jumys istedi. 2002–2009 jyldary respýblıkalyq «Zań» gazetinde tilshi, bólim redaktory qyzmetterin atqardy. Budan keıin «Nur-Astana» gazetiniń Almatydaǵy bólimin basqardy, sondaı-aq «Qazaq gazetteri» JShS bas dırektorynyń orynbasary boldy.

2012 jyly – «Qazaq radıosy» dırektorynyń orynbasary, 2013 jyly – «Qazaqstan-Shymkent» telearnasynyń dırektory qyzmetin atqardy. Al 2024 jyldan beri «Shymkent aqparat ortalyǵy» JShS dırektory laýazymynda boldy.

Aıta keteıik, osyǵan deıin «Turkistan Media Holding» JShS-ne jetekshilik etken Janahmet Aǵybaev óz ótinishi boıynsha qyzmetinen bosatyldy.

Aıta keteıik, budan buryn Túrkistan halyqaralyq áýejaıyna jańa dırektor taǵaıyndalǵanyn jazǵan bolatynbyz.