Ýaqytsha jumys istemeıtin adam zeınetaqy qarjysyn paıdalana ala ma

NUR-SULTAN. QazAqparat - Tengri TV-de ótken tikeleı efırde QR Eńbek jáne áleýmettik qorǵaý mınıstrliginiń ókili Vıktorııa Shegaı zeınetaqy jınaǵynda jetkilikti qarajaty bar, biraq sońǵy ýaqytta jumyssyz júrgen adam ony paıdalana ala ma, degen saýalǵa jaýap berdi, dep habarlaıdy QazAqparat tilshisi.

«Men 47 jastamyn. Meniń zeınetaqy qorymda 4 mıllıon teńge bar, ıaǵnı úı alý úshin paıdalanýǵa bolatyndaı artyq qarajatym bar. Biraq bir jyldan astam ýaqyt boıy zeınetaqy qoryna aqsha aýdarǵan joqpyn. Baspana alatyn jaǵdaıda ol qarajatty paıdalana alam ba, álde sońǵy bir jylda zeınetaqy qoryna aqsha aýdarmaǵanym kedergi bola ma?».

Tengri TV-de ótken tikeleı efırde oqyrman tarapynan osyndaı suraq qoıyldy.

«Zeınetaqy qoryndaǵy qarajatty paıdalaný boıynsha basty nazarda jınaqta jetkilikti qarajat jınalǵanyna nazar aýdarylady. Eger jınaqta qarajatyńyz jetkilikti bolsa, tıisti bóligin paıdalana alasyz. Degenmen, aı saıyn zeınetaqy qoryna aqsha aýdarýǵa mán berý kerek, sebebi aı saıynǵy aýdarymyńyz az bolǵan saıyn bazalyq zeınetaqyńyz da az bolady. Al úı alýǵa qatysty keler bolsaq, bank sizdiń tólem qabiletińiz bar ekenin turaqty tabys kózińiz bar ekenine, aı saıyn zeınetaqy qoryna aqsha aýdarylyp turǵanyna baılanysty baǵalaıdy», - deıdi QR Eńbek jáne áleýmettik qorǵaý mınıstrliginiń ókili Vıktorııa Shegaı.

Budan buryn habarlanǵandaı, Birjan Nurymbetov zeınetaqy jınaǵyn paıdalanýǵa qatysty túsinik berip, ony kimder alatynyn aıtqan edi.

Sondaı-aq, Zeınetaqy jınaǵyn sheship alý úshin onda qansha aqsha bolýy kerek ekeni týraly da jazyldy.