Ýaqytsha tirkeýge baılanysty jumys ýaqyty uzarǵan qyzmetkerlerdi yntalandyramyz - Kóshi-qon basqaramasy
«Bul jumys zańnyń aıasynda uıymdastyryldy jáne qyzmetkerlerdiń quqyqtaryn shektep otyrǵan joq. Endi, jalaqy jaǵynan eshqandaı ózgeris bolmaıdy, sebebi bizdiń jalaqymyz úkimettiń qaýlysymen bekitilgen. Árıne, jeńildikter de joq emes. Qazir xalyqqa qyzmet kórsetý ortalyqtarynda jumys istep jatqan kóshi-qon qyzmetkerleri kesteden tys demalys ala alady, qosymsha kúnder qosylatyn shyǵar. Ol jaǵynan jeńildikter jasalady. Men ózim basshy retinde olardy yntalandyrýǵa tyrysatyn bolamyn. Syıaqy jaǵynan eshteńe aıta almaımyn. Sebebi ol meniń quzyretime jatpaıdy. Men gramota, Alǵys xat sııaqty marapattarǵa ótinishxat jasaı alamyn. Sonyń barlyǵy qyzmetkerdiń jeke qujattarynda da kórsetiledi. Ony biz uıymdastyratyn bolamyz», - dedi Dónenbaeva QazAqparat tilshisine bergen suxbatynda.
Aıta keteıik, qańtardyń 7-sinen bastap, Qazaqstan azamattaryn turǵylyqty jeri boıynsha turaqty tirkeý men ýaqytsha tirkeýge qatysty jańa norma kúshine engennen keıin xalyqqa qyzmet kórsetý ortalyqtarynda adamnyń sany kóbeıdi. Osyǵan baılanysty ortalyqtardyń jumys kúni uzartylyp, demalys kúnderi xalyqty qabyldaý sharalary uıymdastyryldy. Bir aıdan keıin, ıaǵnı aqpannyń 7-sinen bastap turaqty jáne ýaqytsha tirkeýge turmaǵan azamattarǵa aıyppul salynady .
Úıdiń qujattary daıyn bolmasa, jumys orny, ıa bolmasa, týystardyń meken-jaıy boıynsha ýaqytsha tirkeýge turýǵa bolady. Ýaqytsha tirkeýkommýnaldyq tólemderge áser etpeıdi.
