Ýaqytsha tirkeýden keıin páterdi jasyryn túrde jalǵa bergen tıimsiz bolady - rıeltorlar qaýymdastyǵy
ASTANA. QazAqparat - Qazaqstan rıeltorlary birikken qaýymdastyǵynyń prezıdenti Elena Grıvanyń oıynsha, ýaqytsha tirkeýge turmaǵany úshin aıyppul salý normasy kúshine engennen keıin páter jaldaýshynyń ózi ýaqytsha tirkeýge qoıýdy talap etedi. Al páterdi jalǵa berýshiler úshin úıdi jasyryn jalǵa bergenshe ol kásipti resmı túrde júrgizgen tıimdi bolady, dep xabarlaıdy QazAqparat tilshisi.
«Ýaqytsha tirkeý úshin jaýapkershilikti engizgen durys. Sonyń nátıjesinde jaldamaly turǵyn-úı naryǵynyń ashyqtyǵyn qamtamasyz etýge múmkindik bar. Iá, kez kelgen adam páter jaldap turǵandardy óziniń týǵan-týystary dep tanystyryp, úıdi jasyryn túrde jalǵa berse de bolady. Alaıda olaı aqsha tapqan tıimsiz. Sebebi bireý-mireý bilip qoısa, aıyppul tóleýge týra keledi. Qazirgi kezde aıyppul tólegenshe, patent alyp, resmı túrde 2-aq paıyzdyq salyqty tólep otyrǵan tıimdi. Bylaısha aıtqanda, páterdi jasyryn jalǵa beretinder úshin kóleńkeden shyqqan durys», - dedi Grıva QazAqparat tilshisine bergen suxbatynda.
Onyń oıynsha, búginde ýaqytsha tirkeýge turǵyzbaǵany úshin ǵana emes, sol tirkeýge turmaǵany úshin de aıyppul engizilgendikten, páter jaldaýshynyń ózi ýaqytsha tirkeýge turǵyzýdy talap etetin bolady. Sebebi ýchaskelik ınspektor tekserip qalsa, eki jaqqa da shyǵyndalýǵa týra keledi.
«Bir ǵana eskertýim bar, xalyqqa osy ýaqytsha tirkeýdi rettep alýǵa qajetti ýaqytty kóbirek berýge bolatyn edi. Sonda xalyq arasyndaǵy dúrbeleń de týyndamaıdy», - dep atap kórsetti rıeltorlardyń basshysy.
Aıta keteıik, qańtardyń 7-sinen bastap Qazaqstan azamattaryn turǵylyqty jeri boıynsha turaqty tirkeý men ýaqytsha tirkeýge qatysty jańa norma kúshine endi. Bir aıdan keıin, ıaǵnı aqpannyń 7-sinen bastap turaqty jáne ýaqytsha tirkeýge turmaǵan azamattarǵa aıyppul salynady.
Úıdiń qujattary daıyn bolmasa, jumys orny, ıa bolmasa, týystardyń meken-jaıy boıynsha ýaqytsha tirkeýge turýǵa bolady. Ýaqytsha tirkeý kommýnaldyq tólemderge áser etpeıdi.
