Ýaqytsha tirkeýden keıin páter jaldaıtyndardy eshkim tergemeıdi - kóshi-qon polıtsııasy
ASTANA. QazAqparat -Astana qalalyq ishki ister departamenti kóshi-qon basqarmasynyń basshysy Gúlvıra Dónenbaevanyń aıtýynsha, ýaqytsha tirkeýdiń aıasynda páter jaldaıtyn adamdardy anyqtaý sharalary qarastyrylmaǵan. Negizgi maqsat - halyqtyń kóshi-qonyna monıtorıng jasaý. Oǵan qarap, memelekettik organdar bilim berý, densaýlyq saqtaý, jumyssyzdyqty retteý jáne taǵy basqa áleýmettik máselelerdi sheshetin bolady, dep habarlaıdy QazAqparat tilshisi.
«Buǵan deıin bizde ýaqytsha tirkeý bolǵan. Osyny eskerý kerek. Byltyr 20 myńnan astam adam ýaqytsha tirkelgen. Bıylǵy jyldyń ózgesheligi sol - ýaqytsha tirkeýge turmaǵany jáne turǵyzbaǵany úshin aıyppul engizilip otyr. Boldy. Basqa eshqandaı jańalyq joq. Ondaı shara halyqtyń ózine de kerek. Tirkeý ol baqylaý sharasy emes, bul - adamnyń qaıda júrgeni men turǵany týraly memlekettik organdardy eskertý bergeni. Sol mekenjaı boıynsha ol aýrýhananyń kómegine júgine alady, balasyn mektepke beredi jáne taǵysyn taǵy. Memlekettik organdar bolsa, halyqtyń sanyna qarap, mektep, balabaqshamen aýrýhana sııaqty nysandardyń qurylysyn josparlaı alady. Ony da umytpaý qajet»,- dedi Dónenbaeva QazAqparat tilshisine bergen suhbatynda.
Onyń aıtýynsha, kelesi aıda páter jaldaıtyndardy jappaı eshkim teksermeıdi. Sebebi ondaı sharalar kóshi-qon qyzmetiniń mindetine kirmeıdi. Jergilikti ýchaskelik polıtseıler de kúndelikti keste boıynsha jumys isteıdi, ıaǵnı aryz-shaǵym túsken jaǵdaıda ǵana páterde bolyp jatqan mán-jaıdy anyqtap, adamdardy tekseretin bolady.
«Olar qujattyń nómirin jazyp alady da, derekter bazasy arqyly tirkeýdiń bar-joǵyn teksere salady. Al jolda júrgenderdi ýchaskelik bólimshege eshkim súırep aparmaıdy», - dep atap kórsetti Dónenbaeva.
Aıta keteıik, qańtardyń7-si kúni kúshine engen zańnamaǵa sáıkes, ýaqytsha tirkelmegeni úshin ákimshilik jaza, ıaǵnı aıyppul salý sharasy engizilgen bolatyn. Bir aıdyń ishinde tek túsindirý men eskertý jumystary júrgiziledi. Al aqpannyń 7-sinen bastap turaqty jáne ýaqytsha tirkeýge turmaǵan azamattarǵa aıyppul salynady. Ýaqytsha tirkeýge turmaǵany úshin 15 883 teńge, al tirkeýge turǵyzbaǵany úshin 22 690 myń teńge kóleminde aıyppul qarastyrylǵan. Úıdiń qujattary daıyn bolmasa, jumys orny, ıa bolmasa týystardyń mekenjaıy boıynsha ýaqytsha tirkeýge turýǵa bolady. Ýaqytsha tirkeý kommýnaldyq tólemderge áser etpeıdi.
