Ýaqytsha tirkeý stýdentter arasynda qarbalas týdyrmaıdy - maman
ASTANA. QazAqparat - Sońǵy ýaqytta áleýmettik jeliler men mobıldi messendjerler arqyly Qazaqstan azamattaryn ýaqytsha tirkeý bastamasynyń aldymen stýdent jastarǵa qıyndyq týǵyzatyny jaıynda aqparat tarap júr. QazAqparat tilshisi Astanadaǵy joǵary oqý oryndarynyń biri - Eýrazııa ulttyq ýnıversıtetinde bolyp, stýdentterdi tirkeýge alý jumysymen tanysyp qaıtty.
Ol jerde pasport ústeli burynnan beri jumys isteıdi. Ýnıversıtetke túsip, jataqxanaǵa ornalasatyn barlyq stýdentter ýaqytsha tirkeýge alynady.
«Máselen, ótken jyly qyrkúıekte oqý maýsymy bastalǵanda biz 4 500 stýdentti tirkeýge aldyq. Bul - óz ótinishimen tirkeýge turǵan azamattar. Olardyń ishinde magıstranttar da bar. Magıstranttar eki jylǵa tirkelse, stýdentter tórt jyldyq tirkeýge turady. Bes jyl oqıtyndar da bar. Olardyń ýaqytsha tirkelýi bir jylǵa artyq bolady. Bundaı tájirıbe burynnan beri bar. Erejege sáıkes, bizge oqýǵa túsken stýdentterdi birden «pasport ústeline» jiberedi. Osy jerde olar tıisti qujattardy toltyrǵannan keıin xalyqqa qyzmet kórsetý ortalyǵyna barady. Sonda Eýrazııa ulttyq ýnıversıtetiniń atynan ýaqytsha tirkeýge turady. Osynyń barlyǵy áý basta jasalady. Sondyqtan ýaqytsha tirkeýge baılanysty stýdentterdiń arasynda qarbalys týyndamaýy tıis», - deıdi «pasport ústeliniń» bas mamany Maıra Musabekova.
Onyń aıtýynsha, búginde páter jaldap jatqan stýdentter de bar. Olar turǵylyqty jeri boıynsha ýaqytsha tirkeýge turýy tıis. Al jataqxanaǵa kóshetin bolsa, ýnıversıtet tirkeýine alynady.
Aıta keteıik, búgin QazAqparat tilshisi Astana qalasynyń Esil aýdandyq xalyqqa qyzmet kórsetý ortalyǵynda bolyp, stýdentterdiń ýaqytsha tirkeýge turýy boıynsha keńes alǵan bolatyn.
