Ýaqytsha tirkelmegeni úshin jazalaý bir aıdan keıin qolǵa alynady - Qasymov
ASTANA. QazAqparat - QR Іshki ister mınıstri Qalmuxambet Qasymovtyń aıtýynsha, bir aı boıy tártip saqshylary ýaqytsha tirkeýge turmaǵandarǵa tek eskertý ǵana jasaıtyn bolady, dep xabarlaıdy QazAqparat tilshisi.
"Jańa normanyń negizgi maqsaty - ishki kóshi-qondy baqylap otyrý. Osynyń negizinde densaýlyq saqtaý, bilim berý, jumys oryndaryn ashý jáne taǵy basqa áleýmettik-ekonomıkalyq máseleler sheshiledi. Bul - jalpyálemdik tájirıbe. Máselen, Germanııada turaqty meken-jaıynan kóship ketkeni, ıa bolmasa, bóten bireýdiń meken-jaıyn paıdalanǵany úshin 1 000 - 50 000 eýro aınalasynda aıyppul tóleý mindeti bar", - dep atap kórsetti Q.Qasymov.
Aıta keteıik, Qazaqstan azamattaryn ýaqytsha tirkelýge mindetteıtin zań qańtardyń 7-sinen bastap kúshine engen bolatyn. Buǵan deıin turaqty tirkeý mindeti bolǵan. Endi, óz úıine adamdardy turǵyzǵany úshin jaýapkershilik engizilip otyr. Olardy ýaqytsha tirkeýge qoıý qajet. Atalǵan norma bir ret buzylsa, 10 AEK kóleminde aıyppul salynady. Al bir jyldyń ishinde taǵy qaıtalansa, aıyppuldyń kólemi eki esege artady.
