Ýaqyt yrǵalyp-jyrǵalýdy kótermeıdi - baspasózge sholý
***
Elbasy Nursultan Nazarbaevtyń Qazaqstan halqyna arnaǵan Joldaýy qazirgi álemde qalyptasqan kúrdeli kezeńde jarııalanyp otyr. Onyń ústine, bul qujat aldaǵy jyldaǵy mindetterdi naqty aıqyndap berdi. « Egemen Qazaqstan » gazetiniń búgingi sanynda jarııalanǵan Parlament Senaty Qarjy jáne bıýdjet komıtetiniń tóraǵasy Rashıt Ahmetovpen bolǵan suhbatta atalmysh mindetter taldanady.
«Ulttyq qordan aıtarlyqtaı qarjy bólinbek. Sonyń bir bóligi problemalyq nesıeler máselesin sheshýge baǵyttalatyn bolady. Bul máseleni problemalyq nesıeler qoryn qosymsha kapıtaldandyrý arqyly sheshý kózdelgen. Problemalyq nesıeler qory týraly bólek aıta ketpekpin. Bul qarjylar bankterge bólinedi degen bizde qate túsinik bar. Qarjy bankterge emes, Problemalyq nesıeler qoryna bankterden dıskontpen problemalyq nesıelerdi satyp alý úshin bólinedi, olar - qaryz alýshy tóleı, al bank ózinen ysyra almaıtyn nesıeler», - deıdi bir sózinde senator R. Ahmetov. Tolyǵyraq - « Ýaqyt yrǵalyp-jyrǵalýdy kótermeıdi » atty suhbattan oqı alasyzdar.
Erteń - Ulttyq valıýta - teńge kúni. Osydan jıyrma bir jyl buryn osy kúni tól teńgemiz aınalysqa túsken. Osyǵan oraı « Egemen Qazaqstan » elimizdiń ulttyq valıýtasynyń tarıhyna kóz júgirtip, jıyrma bir jyldaǵy jańalyqtary týraly tolymdy maqala usynǵan.
«Bul kún memlekettigimizdiń mártebesi taǵy bir dáleldenip, abyroıymyz asqaqtap, ózgeniń emes, óz ulttyq aqshamyzdy qolǵa ustap, qazaqy dúnıemizdiń qatary qosylyp qýanǵanbyz. Sodan beri bul kúnniń mereıi ústem - mereke», - dep jazady avtor « Ulttyq valıýtany ulyqtar kúni » atty maqalada.
***
Elbasynyń tóraǵalyǵymen Qaýipsizdik keńesiniń otyrysy ótti, dep habarlaıdy « Aıqyn » basylymy « Arqany keńge salýǵa bolmaıdy » atty maqalada.
Gazettiń jazýynsha, otyrysta Qazaqstandaǵy sanıtarııalyq-epıdemıologııalyq jaǵdaı qaralǵan.
«Bul taqyryptyń ózektiligin birqatar faktor, sonyń ishinde álemdegi Ebola vırýsynyń taralýyna baılanysty oqıǵalar kórsetip otyr. Otyrysty ashqan Qazaqstan Prezıdenti halyq densaýlyǵyn qorǵaýdy tıimdi qamtamasyz etý memlekettiń basymdyǵy bar mindetteriniń biri sanalatynyna toqtaldy. «Elimizde juqpaly, sonyń ishinde áleýmettik aýrýlardyń, sondaı-aq Cibir jarasy men brýtsellezdi qosa alǵanda, janýarlardyń qaýipti aýrýlarynyń oshaqtary bar. Sonymen birge Ebola vırýsynyń taralýy sekildi syrtqy qaterler de ulǵaıýda. Turǵyndardy túrli juqpalardan qorǵaý máselesine jiti nazar aýdaryp, tıisti sharalar qabyldaý qajet. Memlekettik organdardyń jaýapkershiligin naqty aıqyndap, olardyń is-qımyldaryn úılestirýdi qamtamasyz etken jón, - dedi Nursultan Nazarbaev», - delingen maqalada.
« Aıqynnyń » gazetiniń « Qazaqstan - « ústemdik ortalyǵyna » aınalady » dep atalatyn taǵy bir materıalynda el Úkimeti Memleket basshysy aldynda «álemdegi jańa salalardaǵy ınnovatsııalardy Qazaqstanda damytý shemasynyń» tanystyrylymyn ótkizýge ázirlenip jatqandyǵyn jazýda.
«Sonyń barysynda «Ústemdik ortalyqtary» degen shartty ataýy bar jańa qurylymnyń tusaýy kesiledi dep kútilýde. Bul týraly keshe, otandyq iri ónerkásiptik kásiporyndardyń basty tehnologııalyq mindetterine arnalǵan jıynda jarııalandy. El basshylyǵynyń tapsyrmasymen, Tehnologııalyq damý jónindegi ulttyq agenttik (TDUA) qazaqstandyq 350 iri jáne orta kásiporyndarmen, sondaı-aq ǵylymı ortamen tize qosa otyryp, ekonomıkamyzdyń 6 jetekshi salasyndaǵy «tehnologııalyq mindetterdi» anyqtapty. Bul - ǵylym men bıznestiń baılanysyn nyǵaıtý, ónertabystyq ázirlemelerdi óndiriske endirý jáne kommertsııalandyrý, ınnovatsııalyq saıasat túzetý úshin qajet bolypty», - delinedi maqalada.
***
Qazaqstandyqtar Almatydaǵy jeke menshik «Káýsár» balalar ınternatynda oryn alǵan jaǵa ustatar oqıǵany áli kúnge deıin qyzý talqylap kele jatyr. Onyń qyzmetkerleri habarlaǵanyndaı, ınternattyń 39 jastaǵy eks-dırektory 12 jasar jetim qyzdy ózine áıel qylyp alǵan. Osyǵan baılanysty « Ekspress K » gazeti mán-jáıdi anyqtaý úshin birneshe memorganǵa saýal joldaǵan.
«Din isteri komıtetiniń ıslam uıymdarymen baılanys basqarmasynyń qyzmetkeri Balǵabek Myrzaev atalmysh aqparatty tekserip jatqandyǵyn habarlady.
- Ázirge aýyzsha anyqtaǵanymyz boıynsha, ol qyz nekege turǵan kezde 16 jasta bolǵan. Biraq bul fakt máseleniń mánisin ózgertpeıdi», - dep túsindiredi ol», - delingen maqalada.
Gazettiń jazýynsha, prokýratýranyń qadaǵalaý organdary atalmysh máselege qatysty tergeý júrgizýde, eger fakt dáleldense, ony qylmystyq jaýapkershilik kútip tur.
