Ýaqyt tıimdi uıymdastyrylsa ony sportqa da, bilim men jumysqa da, demalýǵa jáne dostaryńmen kezdesýge de jetkizýge bolady - N.Nazarbaev
ASTANA. Qyrkúıektiń 1-i. QazAqparat /Gúlmıra Álıakparova/ - Ýaqyt tıimdi uıymdastyrylsa ony sportqa da, bilim men jumysqa da, demalýǵa jáne dostaryńmen kezdesýge de jetkizýge bolady. Bul pikirin QR Prezıdenti Nursultan Nazarbaev búgin Astanadaǵy «Atameken» Qazaqstan kartasy» - etno-memorıaldyq kesheninde 11 synyp oqýshylary men atalmysh keshenniń patrıottar klýbynyń múshelerimen bolǵan kezdesýi barysynda aıtty.
Elbasy, 2009 jyly djıý-djıtsýdan ótken Álem chempıonatynyń kúmis medal ıegeri, № 60-shy mektep-lıtseıdiń 11 synyp oqýshysy Ahmet Atabaevtyń: «Aldaǵy ómirimdi sportpen baılanystyrsam, bolashaǵym qalaı bolady eken?», degen saýalyna jaýap bere kele: «Meniń oıymsha, adamdar óz ýaqyttaryn bosqa ótkizbeýi tıis. Ýaqytty tıimdi uıymdastyra bilseń, ony sportqa da, bilim men jumysqa da, demalýǵa jáne dostaryńmen kezdesýge de jetkizýge bolady. Qazir sizderge álem máńgilik sııaqty bolyp kórinedi. Biraq ómir qarqynmen ótip jatyr. Sondyqtan, eger sportty tańdasań ony sońyna deıin jetkizý kerek. Kez-kelgen sport túri ol seniń qolyńnan kelip tursa ǵana - jaqsy. Qolyńnan kelmese oǵan yqtııaryń da bolmaıdy. Barlyǵy talap pen erikti qajet etedi. Sonda ǵana armanyńa qol jetkize alasyń», dedi N.Nazarbaev.
Prezıdent atap kórsetkendeı, kez-kelgen adamnyń belgili bir baǵytta, ne bolmasa salada qabileti bolady, tek sony qolǵa alyp, jetildirý qajet.
