«Ýaqyt Tańdaýynyń» jeńimpazdary anyqtaldy
ASTANA. QazAqparat - Respýblıkalyq qoǵamdyq-saıası «Prezıdent jáne Halyq» gazetiniń «Ýaqyt Tańdaýy» - «Vybor Vremenı» Agenttigimen birlesken jobasyna sáıkes Jańa jyl qarsańynda dástúrli baıqaýdyń tórt atalym boıynsha jeńimpazdary anyqtaldy.
«Jyldyń úzdik oblys ákimi» atalymynda Almaty oblysynyń ákimi Amandyq Ǵabbasuly Batalov jeńimpaz dep tanyldy. Ol Memleket basshysynyń oblysqa kelgen issapary barysynda berilgen tapsyrmalardy júzege asyrýda eleýli sharalardy júzege asyra aldy. Ónerkásipte 4,5 paıyz ósimmen 456 mlrd. teńgeniń ónimi óndirildi. Óziniń isker oblys basshysy ekendigin baıqatty.
Q. Jubanov atyndaǵy Aqtóbe óńirlik memlekettik ýnıversıteti «Jyldyń úzdik joǵary oqý orny» atandy. Kenjeǵalı Kenjebaev basqaratyn ýnıversıtet shákirtterdi onlaın oqytýǵa arnalǵan tegin ıntellektýaldy Stereo 3d MIOC-School baǵdarlamasyn jasady. Ári ony júzege asyrýdyń Qazaqstan kóleminde basty draıverine aınaldy.
Al aty álemge áıgili boksshy Gennadıı Golovkın Jyldyń úzdik sportshysy atandy. Ol WBA, IBF, IBO tujyrymdary boıynsha álem chempıony, WBC-diń ýaqytsha chempıony. Jerlesimiz kásipqoı boks rınginde 34 ret kezdesý ótkizip, onyń barlyǵynda qarsylasynan basyp tústi. Sondaı-aq 21 jekpe-jekti qarsylasyn nokaýtqa jiberýmen aıaqtady.
Bıyl «Jyldyń úzdik ánshisi» nomınatsııasy estrada men operalyq ónerdi qatar ushtastyryp kele jatqan Lálá Baqytnurqyzyna buıyrdy.
Ol 2015 jyly gastroldik saparlary men beınebaıandary arqyly kórermeni men tyńdarmandarynyń ystyq yqylasyna bólendi. Óziniń tańǵajaıyp daýysymen, bıshilik qabiletimen áriptesteri arasynda oq boıy ozyp tur. Ol búginde qazaq óneriniń shynaıy jaryq juldyzdarynyń biri.
