«Ýaqyt ótip jatyr»: Elordada týberkýlezben kúres aılyǵy jalǵasýda
NUR-SULTAN. QazAqparat – 2021 jyldyń 24 aqpanynan 24 naýryzyna deıin «Ýaqyt ótip jatyr!» uranymen týberkýlezdiń aldyn alý aılyǵy ótip jatyr. Bul týraly qalalyq Qoǵamdyq densaýlyq saqtaý basqarmasy basshysynyń mindetin atqarýshy Álııa Rústemova aıtty, dep habarlaıdy QazAqparat tilshisi.
Spıkerdiń aıtýynsha, aldyn alý is-sharalary shektelip, emhanalarǵa júginetin halyqtyń azaıýyna baılanysty karantın kezeńinde joǵary qaýipti toptarda týberkýlezben syrqattaný úsh ese tómendegen. 2019 jyly halyqty týberkýlezge tekserý boıynsha belsendi sharalardy júrgizgende árbir 100 myń tekserilgen adam arasynan týberkýlezben aýyratyn úsh adam anyqtalsa, 2020 jyldyń qorytyndysy boıynsha bir ǵana adam tabylǵan.
«Osyǵan baılanysty Nur-Sultan qalasynyń qoǵamdyq densaýlyq saqtaý basqarmasy qarasha aıynda týberkýlezdi belsendi anyqtaý úshin «STOP TB» aktsııasyn uıymdastyrdy. Ol óz nátıjesin berdi», - dedi Á. Rústemova.
Bul uran medıtsınalyq uıymdardyń ǵana emes, qala turǵyndary men elorda qonaqtarynyń týberkýlezge tekserýden ótýi, aýrýdyń aldyn alý máseleleri boıynsha bilim deńgeıin arttyrý, árbir adamnyń belsendi jeke ómirlik ustanymyn qalyptastyrý týraly bolmaq.
«Bir aı ishinde qalanyń medıtsınalyq uıymdarynda, áleýmettik jeli men YouTube kanalynda tıisti aqparattar jarııalanady. Osy saladaǵy mamandarmen áleýmettik jelilerde tikeleı efır ótedi. Efır barysynda aýrýdyń aldyn alý, dıagnostıkasy jáne emi týraly suraqtar qoıýǵa bolady. Joǵary qaýip tobyna jatatyn adamdardy týberkýlezge aldyn ala tekserý jáne aqparattandyrýǵa erekshe nazar aýdarylady», - dep tolyqtyrdy Álııa Rústemova.
Aıta keteıik, sońǵy on jylda elordada týberkýlez aýrýy men týberkýlezden bolatyn ólim-jitim 5 esege azaıdy.
