«Ýaqyt bosańsýdy kótermeıdi» - respýblıkalyq basylymdarǵa sholý
***
Keshe Memleket basshysy Nursultan Nazarbaevtyń tóraǵalyǵymen Úkimet músheleri, ákimder, ortalyq memlekettik organdar, «Nur Otan» HDP jáne «Samuryq-Qazyna» UÁQ basshylary qatysqan keńeıtilgen otyrys bolyp ótti. Osy alqaly jıyn arqaý bolǵan maqala «Egemen Qazaqstan» gazetiniń senbilik sanynda «Ýaqyt bosańsýdy kótermeıdi» degen taqyryppen berilgen. Basylymnyń atap ótýinshe, Elbasy daǵdarystyń ekinshi tolqyny jaqyndap kele jatqanyn aıta kelip, Úkimetke tıisti sharalardy belgilep, álemdegi jaǵdaıǵa monıtorıng jasaı otyryp, jan-jaqty daıyndyq jumystaryn júrgizý kerektigin atap kórsetken. «Birinshiden, bul rette bárin Úkimet Keńsesine júkteı bermeı, Premer-Mınıstrdiń orynbasarlarynyń jaýapkershiligin, olardyń mınıstrlermen jáne ákimdermen is-qımyl árekettestigin arttyrý kerek. Ekinshiden, Prezıdent Ákimshiligi Úkimetpen birlese otyryp, jaǵdaıǵa taldaý jasap, memlekettik qyzmet tizbesin qalyptastyrýdy 1 mamyrǵa deıin iske asyratyn bolsyn. Úshinshiden, 1 naýryzǵa deıin mınıstrlikter, vedomstvolar men ákimdikter qurylymy týraly jańa tıptik erejeni bekitip, munan keıin eki aıdyń ishinde olardy ońtaılandyrý jumystaryn júrgizý qajet. Tórtinshiden, 15 sáýirge deıin ulttyq holdıngterdi, kompanııalar men memlekettik kásiporyndardy ońtaılandyrý jóninde usynys ázirlenetin bolsyn», - dedi Elbasy.
«Egemen Qazaqstan» gazetiniń jazýynsha, Astanada Prezıdent Nursultan Nazarbaev Qazaqstan halqyna Joldaýyn jarııalaǵannan keıin Qazaqstan halqy Assambleıasynyń keńeıtilgen otyrysy ótti. Oǵan Assambleıadan saılanǵan Parlament Májilisiniń depýtattary, Qazaqstan halqy Assambleıasy Keńesiniń, ǵylymı-saraptamalyq keńestiń músheleri, respýblıkalyq etnomádenı birlestikterdiń basshylary men BAQ ókilderi qatysty. Basqosý sońynda Joldaýdyń negizgi baǵyttary taǵy da elekten ótkizilip, Qazaqstan halqy Assambleıasynyń Qazaqstan halqyna Elbasynyń Joldaýyn qoldaý týraly úndeýi qabyldandy, Assambleıanyń Joldaýdy aqparattyq-nasıhattaý jáne ǵylymı-sarapshylyq qoldaý baǵyttary aıqyndaldy.
***
Jeksenbi kúni Almatyda dopty hokkeıden álem chempıonatynyń jalaýy jelbireıdi. Álemniń ár qıyrynan kelgen úmitkerler ózderiniń deńgeıi jáne dárejelerine sáıkes úsh dıvızıonǵa bólinip, birer kún sheberlik baıqasady. Reseı, Shvetsııa, Fınlıandııa, Norvegııa, AQSh jáne Qazaqstan sekildi myqtylar ádettegideı «A» tobynda óner kórsetedi. Bas júlde úshin talas osy memleketter arasynda órbıdi. Al ortańqol jáne osaldar sanatyna jatatyn ózge elderdiń ulttyq quramalary tómengi, ıaǵnı «V» jáne «S» dıvızıondarynda oınaıdy. «Myqtylar «Medeýde» aıqasady» degen taqyryppen berilgen osy jáne basqa da sport jańalyqtaryn bilgińiz kelse, «Aıqyn» gazetiniń senbilik sanyn jiberip almańyz.
«Aıqyn» gazetiniń jazýynsha, elimizde janarmaı men ózge de munaı ónimderin halyqqa satatyn operatorlardyń qaýymdastyǵy quryldy. «Qazaqstandyq janarmaı qaýymdastyǵy 1» dep atalatyn bul uıymǵa ázirge janarmaı naryǵyndaǵy 16 táýelsiz operator kirip otyr. Qaýymdastyq taratqan málimdemege sáıkes, bul uıymǵa kez kelgen janarmaı beketiniń qojaıyny nemese munaı ónimderin satatyn kompanııalar kire alady. Al qaýymdastyq elimizde munaı ónimderin óndirý men onyń aınalymyn qadaǵalaıtyn memlekettik organdarmen birlesip, otandyq janarmaı naryǵyn sapaly ónimdermen jetkilikti deńgeıde qamtamasyz etý baǵytynda jumys istemek.
***
«Alash aınasy» gazetiniń turaqty «Dat!» aıdarynda L.Gýmılev atyndaǵy Eýrazııa ulttyq ýnıversıtetiniń prorektory, fılologııa ǵylymynyń doktory Dıhan Qamzabekulymen aradaǵy suhbat «Mátintanýǵa mán bermeıinshe, tildi damyta almaımyz» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ǵalym. «Smaǵul Sádýaqasovtyń bizdiń dáýirimizdegi jaǵdaıy qoǵamdy, jalpy zııalylardy oılandyratyn jaǵdaı boldy. ókinishtisi sol, ult úshin kúresken tarıhtaǵy belgili tulǵalardy qadirleýde ımandylyq jolmen is-sharalar jasaýǵa biz daıyn emes ekenbiz. Biraq ýaqyt degen óz ornynda tura bermeıdi. Tarıhty biz ǵana jasamaımyz, bizden keıin de tarıhty paraqtaıtyn tulǵalar keledi. Sondyqtan bul másele áli de kún tártibinde qala beredi», - deıdi.
***
Memleket basshysy N.Nazarbaevtyń «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Qazaqstan halqyna Joldaýyna oraı Qazaqstan halqy Assambleıasy el azamattaryna Úndeýi jarııalady. Úndeý mátini «Kazahstanskaıa pravda» gazetinde jarııalanyp otyr. Onda: «Joldaýda erekshe nazar halyqtyń densaýlyǵyna, adam ómirine qater tóndiretin aýrýlarmen maqsatty túrde jáne tıimdi kúresý máselesine aýdaryldy. Sonymen qatar, Elbasy keshendi jospar negizinde bilim salasynda, halyqtyń negizgi rýhanı qundylyǵy - otansúıgishtik, etnosaralyq kelisim, toleranttylyq pen qarym-qatynas mádenıeti, izgilikke tárbıeleýdi kúsheıtýdi belgiledi. Prezıdent, áleýmettik jańǵyrtý - jańa Parlament pen Úkimettiń qyzmetindegi, Qazaqstannyń barlyq basqarýshy kúshiniń negizgi mindeti dep aıqyndady», - delingen.
