Ýaqtyly eskertý aýyl turǵynyn ınternet-alaıaqtardyń ákki áreketinen qutqardy
PETROPAVL.KAZINFORM – Ýchaskelik ınspektordyń ýaqtyly eskertýi SQO Mamlıýt aýdanyndaǵy Afonkıno aýylynyń turǵynyn ınternet-alaıaqtardyń ákki áreketinen qutqardy.
WhatsApp qosymshasyndaǵy aýyl chatynda otyrǵan polıtsııa maıory Rýstam Valıev kıberqylmystardyń qaýpi týraly profılaktıkalyq beınerolıkter men jadynamalardy jıi taratyp otyrady.
Osyndaı kezekti beınerolıkti jibergennen keıin aýyl turǵyndarynyń birinen «Ýaqtyly aqparat jiberip otyratyn bizdiń ýchaskelik polıtsııa ınspektoryna rahmet. Jańa ǵana maǵan vatsapqa anyqtaý bóliminenbiz degen áldebireýler habarlasty» dep jazylǵan habarlama kelip túsken.
Áıeldiń daýystap jazǵan habarlamasyna sáıkes, oǵan beıtanys bireýler habarlasyp, onyń týysy jol-kólik oqıǵasyna túskenin aıtqan.
«Alaıaqtar ekeni birden oıyma kelmedi. Tutqanyń arǵy jaǵynda polıtsııadaǵy sııaqty shýlap jatqan daýystar shyǵyp jatty. Meniń jeke derekterimdi aıtyp berdi. Eger Siz jibergen vıdeony kórmegende, alaıaqtarǵa senip qalar edim», - deıdi áıel.
Mundaı shema arqyly adamdardy aldaý keńinen taralǵan. Polıtsııanyń atyn jamylǵan qaskóıler jol apatynan zardap shekken adam aqsha alsa, aryz jazbaýy múmkin ekenin alǵa tartady. Telefon arqyly «Anashym, kómektesshi!» degen jylamsyraǵan daýysty qosýy múmkin. Ádette, suratqan aqshalaryn ózderiniń jibergen adamdary – dropper arqyly aldyrtady.
«Qańtar aıynda Mamlıýt aýdanynda ınternet-alaıaqtyqtyń 2 faktisi tirkeldi, ekeýi de osyndaı stsenarıı arqyly jasaldy, - deıdi aýdandyq polıtsııa bóliminiń bastyǵy polıtsııa polkovnıgi Petr Klımov.
Onyń aıtýynsha azamattardan alaıaqtardyń qýlyqtaryna aldanbaǵany týraly habarlamalar jıi kelip turady.
«Bul – turǵyndardyń polıtsııa qyzmetkerleriniń aqparatyna den qoıyp, túsingenin kórsetedi. Internet-alaıaqtyq – búgingi tańdaǵy ózekti taqyryptardyń biri. Buny jýyrda jergilikti atqarýshy organdardyń, prokýratýra men jurtshylyqtyń qatysýymen ótken vedomstvoaralyq komıssııada talqyladyq. Barynsha kóp adamdy qatý úshin birlesken profılaktıkalyq jumystardy kúsheıtý týraly birqatar sheshimder qabyldandy. Óıtkeni alaıaqtyqtyń qaýpinen habardar adam ǵana óz-ózin qorǵaı alady» - deıdi polıtsııa polkovnıgi Petr Klımov.
