Ýaqyttyń bir saǵatqa artqa jyljýy: ShQO-da mekteptegi sabaq kestesi ózgere me

ÓSKEMEN. KAZINFORM –Shyǵys Qazaqstan oblysynda jańa oqý jylynda oqýshylar mektepke burynǵy sabaq kestesi boıynsha barady.

Óńirde ata-analar arasynda júrgizilgen saýalnama nátıjesine sáıkes, sabaqty bastaý jáne aıaqtaý ýaqyty esh ózgerissiz qaldy. Birinshi aýysym oqýshylary sabaqqa saǵat 08:00–de kelse, ekinshi aýysymdaǵylar sabaqty 19:15–ke deıin aıaqtaıdy.

— Oblys aýmaǵynda sabaqtyń bastalý ýaqyty ózgertilmeıdi. Jalpy bilim beretin mektepterde sabaqtar burynǵy rejımde ótedi. Mektepke deıingi mekemeler men kolledjderde de sabaq kestesine ózgeris engizý josparlanyp otyrǵan joq, — deıdi ShQO Bilim basqarmasy basshysynyń mindetin atqarýshy Jańǵazy Álipbaev.

Aıta keteıik, bul másele kóktemde qyzý talqyǵa salynǵan bolatyn. Keıbir mektepterde ekinshi aýysymdaǵy sabaqty erterek aıaqtaý úshin sabaqtyń bastalý ýaqytyn ózgertý týraly usynys jasalǵan edi.

Alaıda buǵan ata-analardyń kóbi qarsy shyqty. Olar burynǵy kesteni ózgerissiz qaldyrýdy qoldap daýys berdi.

— Kúzde balalar sabaqtan qaıtqanda qarańǵy túsip ketedi. Biraq biz úshin jańaǵa beıimdelgennen góri, úıirmeler men sektsııalardyń kestesin ózgertpeý mańyzdyraq bolyp otyr, — deıdi Óskemen qalasyndaǵy mektepterdiń birindegi 7-synyp oqýshysynyń anasy.

Bilim basqarmasy keshki ýaqytta balalardyń qaýipsizdigi baqylaýda bolatynyn jetkizdi. Mektep aýmaǵy qosymsha jaryqtandyrylyp, kezekshi muǵalimder oqýshylardy mektepten shyǵaryp salyp otyrmaq.

Eske salsaq, osyǵan deıin Jambyl mektepterine órt qaýipsizdigi erejelerin buzǵany úshin taǵy da aıyppul salynǵany habarlanǵan.