Ýaqyttyń aýysýy adam psıhıkasyna áser etpeıdi — maman
ASTANA. KAZINFORM — Bıylǵy 1 naýryzdan bastap Qazaqstanda ýaqyt beldeýi biryńǵaı júıege aýysady. Osyǵan oraı Astana medıtsına ýnıversıteti akademık E.Dálenov atyndaǵy profılaktıkalyq medıtsına ǵylymı zertteý ınstıtýtynyń jetekshi ǵylymı qyzmetkeri Janna Nurbergenmen tildesken edik.
«Ýaqyttyń jyljýy — psıhoemotsıonaldy faktor. Biraq ýaqyt beldeýiniń 1 saǵatqa aýysýy adam psıhıkasy men aǵzasyna aıtarlyqtaı áser etpeıdi. Beıimdelýge kóp bolsa 2-3 kún qajet, rejımdi az ýaqytta rettep alýǵa bolady. Men Batys óńirdiń týmasymyn, bizde Astanadan 1 saǵat aıyrmashylyq bar. Týǵan jerimde bir apta, bir aı bolyp Astanaǵa kelgende aıtarlyqtaı ózgeris nemese úırene almaı qınalý baıqalmady», — deıdi Janna Nurbergen.
Mamannyń aıtýynsha, kez kelgen nársege beıimdelý kezinde eń aldymen uıqy men tamaqty retteý kerek.
«Asty uıyqtar aldynda kem degende 3 saǵat buryn ishken jón. Sol sııaqty jatar aldynda múmkindiginshe shekten tys suıyqtyq ishpegen durys. Osy atalǵan eki ereje adamnyń jańa ortaǵa, ýaqyt aıyrmashylyǵyna tez beıimdelýine múmkindik beredi», — deıdi ol.
Sondaı-aq, ǵylymı qyzmetker saǵattyń jyljýy túnde nemese mezgilsiz ýaqytta jumys isteıtin adamdarǵa áser etýi múmkin ekenin aıtty.
«Bul jerde másele olardyń ýaqtyly uıyqtamaýynda. Óıtkeni, tún — uıqynyń ýaqyty. Ýaqtyly uıyqtamaǵannan adam aǵzasynda gormonaldy teketires bolyp, bıorıtm buzylady. Sebebi ol adam kúndiz uıyqtaıdy. Osy sanattaǵy adamdarǵa ýaqyttyń aýysýy bilinýi múmkin», — dedi spıker.
Odan bólek, J.Nurbergen qoǵamnyń osy jańalyqty qabyldaýyna pikir bildirdi.
«Ýaqyt beldeýi aýysady degen habar taraǵaly áleýmettik jelilerde túrli aqparattar, pikirler tarap jatyr. Ýaqytty alǵa nemese artqa jyljytý adamdardy túrli júıke aýrýlaryna ákeledi deýshiler de bar. Ol — qate pikir», — dep túıindedi maman.
Eske sala keteıik, 1 naýryzdan bastap elimizdiń búkil aýmaǵynda biryńǵaı ýaqyt beldeýi ornaıdy.
Atalǵan ózgeris Úkimet qaýlysymen bekitildi.
