Ýaqytsha ustaý ızolıatorynan qashyp shyqqan aqtóbelikke sot úkimi shyqty
AQTÓBE. KAZINFORM - 33 jastaǵy aýdan turǵyny buǵan deıin birneshe ret isti bolǵan. Bıyl mamyr aıynda 2 jylǵa bas bostandyǵynan aıyrylyp, ýaqytsha ustaý ızolıatorynan qashyp shyqqan. Endi ol jazasyn qaýipsizdigi qatań tártiptegi túzetý mekemesinde óteıdi.
Qarǵaly aýdandyq sotynda 33 jastaǵy sottalýshyǵa qatysty is qaraldy. Ol buǵan deıin Qylmystyq kodekstiń 346-baby 1-bóligi jáne 200-baby 2-bóligi 1-tarmaǵy boıynsha túpkilikti 2 jyl 6 aıǵa bas bostandyǵynan aıyrylǵan. Arada bir jyl ótkende jazany óteý merzimi qysqartylyp, shartty túrde bostandyqqa shyqty. Al 2026 jyldyń mamyr aıynda Qylmystyq kodekstiń 346-baby 1-bóligimen 2 jylǵa bas bostandyǵynan aıyryldy. Sottalýshy sot zalynan qamaýǵa alyndy. Alaıda ol qamaýda otyrǵan jerinen qashyp shyǵyp, Qylmystyq kodekstiń 426-baby 1-bóligimen taǵy aıyptaldy.
Іs materıalyna súıensek, 33 jastaǵy aýdan turǵynyna 2026 jyldyń 12-mamyry kúni sot úkimi shyǵady. Jazasyn óteýshi ýaqytsha ustaý ızolıatorynda otyrǵan kezde aýmaq ishinde keshki serýenge shyǵady. Sol kezde sottalýshy qashyp ketýdiń amalyn jasaıdy. Temir esikti ashyp, aýlanyń ekinshi bóligine ótedi. Keıin qabyrǵadan shyǵyp turǵan kirpishten basyp, ǵımarattyń shatyryna minip júgiredi jáne qashyp úlgeredi.
Sot otyrysynda sottalýshy ózine taǵylǵan aıypty moıyndady. Qashyp shyqqan soń jolǵa shyǵyp, kólik toqtatyp mingen. Aqtóbe qalasyna jeter-jetpesten ony polıtsııa ustap alady.
Sot úkimimen sottalýshy Qylmystyq kodekstiń 426-baby 1-bóligimen aıypty dep tanylyp, 1 jyl 6 aıǵa bas bostandyǵynan aıyrý jazasy taǵaıyndaldy. Qylmystyq kodekstiń 58-baby 2 jáne 6 bólikterimen túpkilikti 2 jylǵa bas bostandyǵynan aıyrý jazasy taǵaıyndaldy. Sottalýshy jazasyn qaýipsizdigi qatań tártiptegi túzetý mekemesinde óteıdi.
Eske salsaq, Aqtóbede ondaǵan kólikti zańsyz tirkegen qylmystyq topqa sot úkimi shyqty. Sottalýshylar 5 jyl 6 aıdan 9 jylǵa deıin bas bostandyǵynan aıyryldy. Olarǵa Qylmystyq kodekstiń tórt baby boıynsha aıyp taǵyldy.
