Saǵat beldeýi aýysqan soń mektepte sabaqtyń bastalatyn ýaqyty ózgere me

ASTANA. KAZINFORM – Oqý-aǵartý mınıstrligi elimizdiń biryńǵaı saǵa beldeýine kóshýine baılanysty mekteptegi sabaqtyń bastalý ýaqytynyń ózgerý múmkindigine qatysty saýalǵa naqty jaýabyn berdi.

Vedomstvonyń atap ótýinshe, mektepke deıingi bilim berý uıymdarynyń, orta, tehnıkalyq jáne kásiptik bilim berý uıymdarynyń jumys ýaqytyn belgileý jergilikti atqarýshy organdardyń quziretine kiredi.

«Óńirlerdiń bilim basqarmalary usynǵan aqparatqa sáıkes, sabaq bekitilgen qoldanystaǵy kestege sáıkes bastalady. Sabaq esh ózgerissiz shtattyq rejımde jalǵasady», — dep atap ótti Oqý-aǵartý mınıstrligi agenttik tilshisiniń resmı saýalyna bergen jaýabynda. 

Sonymen qatar oqý protsesin ońtaıly uıymdastyrý úshin oblystardyń, Astana, Almaty jáne Shymkenttiń bilim basqarmalaryna bilim mekemeleriniń basshylaryna, pedagogtar, oqýshylar jáne olardyń ata-anasyna túsindirý jumysyn júrgizip, el aýmaǵyndaǵy ýaqyt beldeýiniń ózgeretinin qulaǵdar qylýǵa keńes berildi. 

Aıta keteıik, Úkimettiń qaýlysyna sáıkes 1 naýryz saǵat 00:00–den bastap eldiń búkil aýmaǵynda biryńǵaı saǵattyq beldeý (UTC+5) belgilenedi. 

Astana, Almaty, Shymkent qalalarynyń, Aqmola, Almaty, Jambyl, Qaraǵandy, Qostanaı, Pavlodar, Soltústik Qazaqstan, Túrkistan, Shyǵys Qazaqstan oblystarynyń jáne Abaı, Jetisý, Ulytaý oblystarynyń ákimdikteri 29 aqpannan 1 naýryzǵa qaraǵan túni (saǵat 00:00–de) jergilikti ýaqytty 1 saǵat keıinge shegeredi.