Ýákiletti organdar jańalyq engizbes buryn ony halyqqa túsindirýi qajet - Toqaev
ASTANA. QazAqparat - Ýákiletti organdar kez kelgen jańalyqty engizbes buryn jergilikti halyqpen, bıznes-qaýymdastyqpen jáne memlekettik organdarmen jan-jaqty túsindirý jumystaryn júrgizýi qajet. Bul týraly búgin QR Parlamenti Senatyndaǵy zań shyǵarý protsesin jetildirý máseleleri jónindegi Úkimet saǵatynda joǵary palata spıkeri Qasym-Jomart Toqaev aıtty, dep habarlaıdy QazAqparat tilshisi.
Senat tóraǵasynyń aıtýynsha, zańnamalyq nemese zańǵa táýeldi deńgeılerde reglamentteý úshin kún tártibine qoıylatyn máselelerdiń arajigin ajyratý - zań shyǵarý júıesindegi kúrdeli máselelerdiń biri bolyp otyr. El Konstıtýtsııasynyń 61-babynyń 3-tarmaǵynda zańnamalyq retteýdiń shegi naqty aıqyndalǵanyna qaramastan jekelegen máselelerdiń mańyzyn joǵary qoıý úshin belgilengen shekterdi buzýǵa degen umtylystar áli de oryn alýda.
«Sonyń saldarynan zań shyǵarý qyzmeti taqyryptyq jaǵynan tarylyp, zańdar arqyly vedomstvolyq, salalyq, óńirlik jáne basqa da memlekettik aýqymnan tys múddelerdi qanaǵattandyrý úrdisi týyndap otyr», - dedi ol.
Sonymen qatar Qasym-Jomart Toqaev Memleket basshysy altynshy shaqyrylymdaǵy Parlamenttiń úshinshi sessııasynyń ashylýynda jańadan qabyldanatyn zańdar boıynsha quqyqtyq túsindirý jumystaryn júrgizýdiń mańyzdylyǵyna erekshe nazar aýdarǵanyn eske saldy.
«Bizdiń oıymyzsha, bul másele túbegeıli jańa kózqarastar men tásilderdi talap etedi. Memlekettik organdar osy másele boıynsha tsıfrlyq tehnologııalar men qalyń jurtshylyq arasynda keńinen taralǵan áleýmettik jelilerdi tıimdi paıdalanyp, neǵurlym belsendi jáne jańa kózqarastardy ustanýy qajet. BAQ keńistiginde keńinen jarııalaı otyryp, ózekti máseleler boıynsha beınerolıkter kórsetý, baspasóz-konferentsııalaryn, dıspýttar men pikirtalastar ótkizý zań shyǵarmashylyǵy protsesiniń ajyramas bóligine aınalýy tıis. Ýákiletti organdar kez-kelgen jańalyqty engizbes buryn jergilikti halyqpen, bıznes-qaýymdastyqpen jáne memlekettik organdarmen jan-jaqty túsindirý jumystaryn júrgizýi qajet», - dedi Q.Toqaev.
Onyń atap ótýinshe, negizgi quqyq salalaryn damytýdyń ornyqty tásilderin ázirleýmen aınalysatyn salaaralyq ǵylymı ınstıtýttardyń joqtyǵy da sheshimin tappaǵan máselelerdiń qatarynda.
«Mundaı ınstıtýttar depýtattarǵa konsýltatsııalyq, ádistemelik, aqparattyq jáne quqyqtyq kómek kórseter edi. Ázirge biz Ádilet mınıstrligi janyndaǵy Zańnama ınstıtýtynyń kómegine júginemiz», - dedi ol.
Sonymen qatar Senat spıkeri halyqaralyq sharttardy jasasý, olardyń iske asyrylýyn baǵalaý, sondaı-aq olardy ulttyq zańnamaǵa engizý barysyndaǵy anyq jáne aıqyn júıeniń bolmaýy da aıryqsha nazar aýdarýdy qajet etetindigin basa aıtty.
«Quqyqtyq monıtorıng ınstıtýtyn odan ári damytý úshin júıeli jáne uıymdastyrýshylyq sıpattaǵy sharalardy qabyldaý talap etiledi. «Memlekettiń salaýaty zańdardan bastalyp, zańdylyqpen aıaqtalady» degen belgili tujyrym zańdardy tıimdiligine qarap qabyldaýdyń asa qajet ekenin kórsetedi»,- dedi Q.Toqaev.
