Ýákiletti ekonomıkalyq operatorlar ınstıtýty jetildiriletin bolady - Májilis
ASTANA. QazAqparat - Búgin Májiliste «Qazaqstan Respýblıkasynyń keıbir zańnamalyq aktilerine kedendik ákimshilendirý máselesi boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti.
Atalǵan qujat Memleket basshysynyń Parlament sessııasyn ashý barysynda júktegen tapsyrmasyn oryndaý maqsatynda ázirlengen.
«Zań jobasy elimizdegi kedendik rásimderdi ońaılatý jáne úılestirý jónindegi Kıoto konventsııasynyń standarttaryna sáıkestendirýdi qarastyrady. Zań jobasy sondaı-aq Qazaqstannyń kedendik zańnamasyn jetildirý, syrtqy ekonomıkalyq qyzmet salasynda memlekettiń básekege qabilettilik reıtıngin jaqsartý, halyqaralyq saýdany damytý maqsatynda ázirlengen», - deıdi Qarjy vıtse-mınıstri Ardaq Teńgebaev.
Onyń sózine qaraǵanda, qujatta keden isi salasyndaǵy ýákiletti organnyń jeke paıdalanýǵa arnalǵan taýarlar boıynsha talaptardy belgileýdegi quziretin aıqyndaý, halyqaralyq sharttar boıynsha taýarlardy ákelý kezinde jeńildikterdi qoldanýda memlekettik organdardyń ózara is-qımyl tártibin ázirleý jáne qabyldaýda quziretin aıqyndaý sekildi birqatar jańalyqtar engizilip otyr. Sonymen qatar, jańalyqtardyń bir parasy ýákiletti ekonomıkalyq operator qyzmetin jetildirýge baǵyttalady.
«Qazirgi tańda osyndaı ýákiletti operatorlar Eýroodaq, AQSh, Túrkııa sekildi álemniń 60-tan astam elinde bar. Qazaqstandaǵy 91 ýákiletti ekonomıkalyq operatordyń 11-i óndiristik kompanııa bolyp tabylady», - deıdi Ardaq Teńgebaev.
Onyń sózine qaraǵanda, zań jobasyndaǵy ýákiletti organnyń jeke paıdalanýǵa arnalǵan taýarlar boıynsha talaptardy belgileý týraly normasy «kóleńkeli» ekonomıkadan resmı túrde kásipkerlik qyzmetpen aınalyspaıtyn jeke tulǵalardy anyqtaýǵa septigin tıgizedi. Sonymen qatar, mundaı qadam jeke tulǵalarǵa qatysty qoldanylatyn shekteýlerdiń jarııalylyǵyn qamtamasyz etýge, kedendik tólemder men salyqtardy kóbeıtýge yqpal etedi.
