Ýaqap Qydyrhanulyn qazaq pýblıtsıstıkasyndaǵy dıasporataný taqyrybynyń tuńǵysh iz salýshysy deýge bolady - T. Mamashev
ALMATY. 22 jeltoqsan. QazAqparat - Ýaqap Qydyrhanuly qazaq baspasózinde «Mıgratsııa álemde ári saıasat, ári adamgershilik, ári ǵylym» dep tuńǵysh jar salǵan jáne bul tujyrymdy eń alǵash dáleldegen adam.
Bul týraly keshe Almatyda Qazaqstannyń eńbek sińirgen mádenıet qaıratkeri jáne Qazaqstannyń qurmetti jýrnalısi Ý.Qydyrhanulynyń 80 jyldyq mereıtoıyna arnalǵan saltanatty keshte aıtyldy.
«Bul kisiniń kóshi-qondaǵy atqarǵan eńbegi ushan-teńiz ekenin el jaqsy biledi. Men úshin Ýaqap aǵamyzdyń bar ómiri, taǵdyry, bolmys-bitimi qazaq kóshi-qonynyń joqshysy bolýǵa arnalǵandaı kórinedi de turady. Erte keńestik kezeńniń ózinde shet eldegi otandastarmen baılanys jasasý jónindegi Qazaqstan qoǵamynda, keıin bul qoǵamnyń elaralyq «Shalqar» gazetinde bas redaktor bolyp qyzmet atqardy», - deıdi Dúnıejúzi qazaqtary qaýymdastyǵy tóraǵasynyń orynbasary Talǵat Mamashev. Onyń aıtýynsha, qaıratker pýblıtsıstiń ýaqyt tynysyn tap basyp tanyp, óz kezeńinen oza júretin kóregendigi de bar. Bul týraly mereıtoıǵa oraı qaýymdastyqtyń tikeleı atsalysýymen shyǵarylǵan «Óz elim - ózegim» atty kitaptyń alǵysózinde aıtylady.
