Ýahabızmniń nasıhattalýyn qoldaıtyn joǵary laýazymdy memlekettik qyzmetkerler bar - depýtat
Teris dinı aǵymdardy qoldaýshylar bıliktiń joǵary satylarynda da otyr. QazAqparat tilshisiniń saýalyna jaýap bergen Májilis depýtaty Ermurat Bapı osylaı deıdi.
«Siz depýtattyq saýalyńyzda ýahabızm men jat aǵymdardy nasıhattaýdy qoldaıtyn joǵary laýazymdy memlekettik qyzmetkerler bar ekenin aıttyńyz. Olar qandaı qurylymdarda qyzmet etedi, aıtqan sózińizge naqty dáleli bar ma?» - dep suradyq Ermurat Bapıden Májilistiń jalpy otyrysynan keıin.
Buǵan jaýap qatqan májilismen teris dinı aǵym qoldaýshylary mańyzdy memlekettik organdarda otyrǵanyn aıtty.
«Teris dinı aǵymdardy, ýahabızm aǵymyn qoldaýshy jekelegen adamdar bılikte, Úkimette de bar, ókinishke qaraı Parlamenttiń óz ishinde de bar dep oılaımyn. Bul teris aǵym bizdiń qoǵamdy jáne memlekettik bılikti birtindep jaılap bara jatyr. Ol ulttyq dinimizge qaýip tóndiretin úrdis dep aıtýǵa bolady», - dep jaýap berdi Ermurat Bapı. - Bizdiń myń jyldyq dinı dástúrimiz bar. Sol negizde júrýimiz kerek. Eger biz din arqyly memlekettik negizimizge soqqy bergizetin bolsaq, onda bizdiń bolashaǵymyzdyń kúńgirt bolǵany».
Toqtala keteıik, búgin Májilistiń jalpy otyrysynda Ermurat Bapı din tóńiregindegi túıtkilderdi retteýdi surap, depýtattyq saýal joldady. Májilismen máseleni sheshý joly retinde din máselesin qatań retteý kerektigin usyndy.
«Jasyratyny joq, memlekettik bıliktiń óz ishinde de ýahabızm men jat aǵymdardy nasıhattaýdy qoldaıtyn joǵary laýazymdy memlekettik qyzmetkerler bar degen derek meniń qulaǵyma jetti. Eger osy sóz qańqý emes, naqty jaǵdaı osylaı bolsa, onda bizdiń táýelsiz memlekettigimizge shynynda da qater tóngeni. Bir ókinishtisi – bul ıslamdyq sekta Qazaqstannyń biraz aımaǵynda: Atyraý, Aqtóbe, Mańǵystaý, Ulytaý, Almaty óńirinde etek jaıyp barady. Bul óńirlerdiń shaǵyn bıznesin, ásirese bazar saýdasy tóńiregin ýahabshylar, salafızm ıdeıasyna tabynýshylar basyp barady, ıaǵnı teris sektanyń damýyna keńinen múmkindik berip, jan-jaqty jaǵdaı jasap otyrǵan jergilikti bılik ókilderi bar degen sóz», - dedi Ermurat Bapı Premer-Mınıstr Álıhan Smaıylovqa joldaǵan depýtattyq saýalynda.
