Ýáde bar, nátıje joq: Atyraýda apatty úı turǵyndary qaýippen ómir súrip jatyr
ATYRAÝ. KAZINFORM — Atyraý qalasyndaǵy Qarshyǵa Ahmedııarov kóshesindegi № 2 apatty turǵyn úıdiń turǵyndaryna berilgen kóshirý týraly ýáde áli oryndalmaǵan.
Qaýipti dep tanylǵan ǵımarattyń turǵyndary qabyrǵasy jarylyp, tóbesi sógilip jatqan úıde ómir súrip jatqanyn aıtyp, kóshirý jumystaryn jedeldetýdi suraıdy.
Turǵyndardyń sózinshe, 4 qabatty úı 1960 jyldary salynǵan. Qazirgi ýaqytta ǵımarattyń qabyrǵalary jarylyp, tóbesi sógilip, irgetasy úgitile bastaǵan. Aýyr júk kólikteri ótken saıyn úı dirildep, qabyrǵalar qozǵalady deıdi turǵyndar.
— Úı eski, apatty dep tanylǵan. Ákimdik qyzmetkerleri birneshe ret kelip, tekserip, barlyq kireberisti qujattady. Bizge 2026 jyly kóshiremiz dep aıtqan bolatyn. Biraq úıdiń jaǵdaıy kúnnen-kúnge nasharlap barady. Jańbyr jaýǵan kezde sý ekinshi qabatqa deıin aǵady, — deıdi turǵyn Anar Qalıeva.
Úıdiń birinshi qabatynda kásip júrgizip otyrǵan kásipkerler de máseleniń sheshilmeı kele jatqanyna alańdaýly. Olardyń aıtýynsha, jańbyr jaýǵan saıyn káriz júıesi tasyp, kásip nysandaryn sý basady.
— Dúkenimniń ishin únemi sý alyp ketedi. Apta saıyn arnaıy tehnıka shaqyryp, sýdy sorǵyzýǵa májbúrmin. Ár shaqyrǵan saıyn 25 myń teńge shyǵyn ketedi, — deıdi kásipker Ásemgúl Moldasheva.
Apatty úıde turatyn atyraýlyqtardyń aıtýynsha, buǵan deıin Atyraý qalasynyń ákimimen kezdesýde bul taqyryp kóterilip, úıdi kóshirý máselesi sheshiledi degen ýáde berilgen. Alaıda arada ýaqyt ótse de naqty jumys bastalmaǵan.
Atyraý qalalyq turǵyn úı-kommýnaldyq sharýashylyǵy jáne turǵyn úı ınspektsııasy bóliminiń basshysynyń orynbasary Oljas Hasanovtyń málimetinshe, qalada búginde apatty dep tanylǵan 89 turǵyn úı bar. Olardy kóshirý jumystary kezeń-kezeńimen júrgizilip jatyr.
— Bıyl bul úı kóshiriledi dep aıta almaımyn. Barlyq apatty úılerdi zerdelep, basymdyqtardy anyqtaýymyz qajet. Sonymen qatar bıýdjette osy úıdiń barlyq turǵynyn qamtamasyz etetindeı turǵyn úı qory bolýy kerek, — dedi Oljas Hasanov.
Buǵan deıin 2 jyl buryn tasqyn kezinde úıleri apatty dep tanylyp, ótemaqy alǵan 99 turǵyndy Jylyoı aýdany ákimdigi sotqa bergeni jóninde jazǵan edik.
