Ýáde bar, nátıje joq: Atyraý jastary QJ lıgadan shet qaldy

Úsh jyldan beri atalǵan lıgaǵa qatysyp kele jatqan jergilikti komandalar bul joly tizimge ilikpegen. Qaladaǵy «Munaıshy» stadıony jóndeý jumystaryna jabylady. Tomarlydaǵy alań lıga talaptarynyń birqataryna sáıkes kelmeıdi. Al byltyr jańǵyrtylǵan «Sýdoremontnık» stadıonyndaǵy alań daıyn tursa da áli sertıfıkattaýdan ótpegen.

Osyǵan baılanysty lıga uıymdastyrýshylary «Atyraý» komandalaryn qatysýshylar qatarynan shyǵarǵan. Ata-analardyń aıtýynsha, másele buǵan deıin de birneshe ret kóterilgen. Alaıda ýáde bergen ákimdik ókilderi sezim sóılep, aryq shyqqan.

- Bizge ýáde berdi. «B josparymyz bar, kerek bolsa Aqtaýda oınaısyzdar» dedi. Biraq lıga uıymdastyrýshylaryna bizdiń óńir atynan olqylyqtyń ornynyń toltyramyz degen kepildik hattyń berilgenine kúmán bar. Al alańy tolyq daıyn emes «Taraz» kepildik hat berip, lıga oıyndaryna qatysaıyn dep jatyr. Osy jaǵdaı kópti alańdatyp otyr,- dedi ata-ana Gúljanat Tájimǵalıeva.

QJ League 2009–2012 jyly týǵan jasóspirimder úshin mańyzdy alań sanalady. Munda oıynshylar tájirıbe jınap, kásibı deńgeıge kóterilýge múmkindik alady. Onyń ústine qatysý shyǵyndaryn lıga uıymdastyrýshylary óz moınyna alady.

- 20 naýryz kúni balalarymyz oınatyn «Atyraý» komandasynyń lıga tiziminde joq ekenin bildik. Bul jańalyq bizdi jáne balalarymyzdy eseńgiretin tastady. 100 bala búgin ǵana alańǵa kelmedi, olar alty jasynan beri kásibı túrde daıyndalyp, baryn salyp daıyndalyp júr. Oblystyq sport basqarmasy, klýb basshylyǵy lıganyń qashan bastalatynyn biledi. Aldyn ala qam jasaý kerek edi. Salǵyttyq tanytyp, kem ketikti jasadyq degenniń ózinde uıymdastyrýshylarǵa «kepildik hat» jiberilmek, biz lıgadan tys qaldyq dep oılaımyz,-dedi jas ftýbolshynyń anasy Jibek Seıtaeva.

Al «Atyraý» fýtbol ortalyǵynyń jetekshisi Qýanysh Qabdolov alańnyń jaqyn kúnderi sertıfıkattaýdan ótetinin málimdedi.

- Qys boıy alań qar astynda jatty. Ótken aptanyń basynda alańǵa sertıfıkattaýda ótkizetin mamandar kelip tekserdi. Alańdy taraý máselesi qozǵaldy. Osy aptada olar qaıta kelip, ózderiniń apparattarymen tekseredi. QFF atynan jarystardy ótkizýge bolady degen sertıfıkat beredi,- dedi ol.

Byltyr ǵana jóndeýden ótken bizdegi alańdy jaýaptylar lıga oıyndary bastalǵansha tolyq daıyndaýǵa talpynyp jatyr. Úlgermegen jaǵdaıda Aqtaýdaǵy stadıondy jalǵa alý úshin kelisim jasap qoıǵan. Bul másele boıynsha biz uıymdastyrýshylarmen baılanystyq. Al olar oıyndy basqa qalada ótkizýge bolmaıdy dep otyr.

- «Atyraý» FK tarapynan «Sýdoremontnık» stadıonynda jóndeý jumystary júrgizilip jatqan kezeńde QJ League-tiń tórt jas sanaty boıynsha komandalardyń úı matchtaryn ýaqytsha Aqtaý qalasynda ótkizý usynysy tústi. Alaıda Lıga saıasatyna sáıkes, komandalardyń barlyq logıstıkalyq shyǵyndary ortalyqtandyrylǵan túrde Freedom QJ League qarajatynan óteletindikten, eleýli fors-major jaǵdaılary bolmaǵan jaǵdaıda matchtar tek qatysýshy komandanyń óz qalasynda ótkizilýi tıis, - dep pikir bildirdi QJ League baspasóz qyzmeti

Ala doptyń aınalasyndaǵy aıqaý shý munymen bitpeıdi. Balalardy shyńdap júrgen jattyqtyrýshylar 2 aıdan beri aılyqsyz jumys istep júr. Sońǵy jańalyq komandanyń, ıaǵnı jas órenderdiń taýyn qaıtaryp, jigerin qum qylǵan.

- 2026 jyly osy lıgada óner kórsetetin komandalardyń deńgeıi bizdiń komandamen shamalas dep ashyq aıtýǵa bolady. Al ekinshi lıgada oınaıtyn komandalardyń deńgeıi, árıne, QJ lıgadaǵy komandalardaı joǵary emes. Sondyqtan jigitter myqtylarmen jarysyp, ózara baq synasqysy keledi. Eshkimniń de qandaı da bir adamdardyń kesirinen, sporttyq qaǵıdattarǵa emes, basqa sebepterge baılanysty tómengi lıgaǵa túsip qalǵysy kelmeıdi,-dedi jattyqtyrýshy Abylaıhan Kakım.

Belgili bolǵandaı, bıyl QJ lıgada 12 komanda ǵana óner kórsetedi. Qatysýshylar tizimi Qazaqstan fýtbol federatsııasynyń Atqarýshy komıteti tarapynan bekitilgen jáne ózgertýge kelmeıdi.Lıga oıyndary sáýir oıynyń ortasynda bastalýy tıis.

- Chempıonattyń bastalýyna bir aıdan az ýaqyt qaldy. Lıga komandalardyń syrt alańdaǵy matchtaryna bıletterdi satyp alyp qoıýdy bastady, ótinim berý naýqany júrip jatyr. Qatysýshylar tizimi Qazaqstan fýtbol federatsııasynyń Atqarýshy komıtetimen bekitilgennen keıin oǵan ózgerister engizý múmkin emes. Sondaı-aq qatysýshylar sanyn 14 komandaǵa deıin arttyrý múmkin emes. Lıga logıstıka men turý shyǵyndaryn tolyqtaı óz moınyna alady. Aǵymdaǵy maýsymnyń bıýdjeti «A» dıvızıonynda 4 jas sanaty boıynsha 12 komandanyń qatysýymen jarystar ótkizýge eseptelgen, - dep málimdedi QJ League baspasóz qyzmeti.

Al Atyraý oblystyq dene shynyqtyrý, sport jáne týrızm basqarmasy barlyq daıyndyq jumystary tolyq júrgizildi, komandanyń lıgaǵa qatysýy federatsııanyń resmı sheshimine baılanysty dep otyr.

- «Sýdoremontnık» stadıony lıga talaptaryna tolyq sáıkes daıyndaldy. Alań jabyndysy (gazon) 2025 jylǵy jeltoqsan aıynda tolyq jańartylyp, qazirgi tańda paıdalanýǵa daıyn kúıde. Nysan 2026 jylǵy 20 naýryzda QJ lıgasynyń barlyq talabyna tolyq daıyn boldy. Al lıga aıasyndaǵy alǵashqy oıyndardyń bastalý merzimi 2026 jylǵy 18 sáýirge josparlanǵan. Stadıon ınfraqurylymy UEFA standarttaryna tolyq sáıkes keledi: zamanaýı fýtbol alańy, elektrondy tablo, beınetúsirilimge arnalǵan arnaıy munaralar jáne alańdy qorshaıtyn jarnamalyq borttar, - dep habarlady Atyraý oblystyq dene shynyqtyrý,sport jáne týrızm basqarmasy.

Ata-analar endi máseleni sheshýge ortalyqtaǵy organdar men lıga basshylyǵy aralasýyn suraıdy. Olardyń pikirinshe, bul tek bir komandanyń emes, óńirdegi jas fýtbolshylardyń bolashaǵyna tikeleı áser etetin jaǵdaı.

Aqpan aıynda «Atyraý» fýtbol klýby sattyqqa shyǵaryldy. Satyp alýǵa nıetti kásipker ákimdiktiń talaby boıynsha keminde 1 mlrd teńgege fýtbol akademııasyn salý kerek.