Ú.Shaıahmetova qaıtadan Qazaqstan gımnastıka federatsııasynyń prezıdenti bolyp saılandy
ASTANA. QazAqparat - 29 qańtarda Almatyda qazaqstandyq gımnastıka federatsııasynyń eseptik-saılaý konferentsııasy bolyp ótti.
Federatsııanyń baspasóz qyzmetiniń habarlaýynsha, uıymnyń basshysy bolyp besjyldyq olımpıadalyq merzimge Qazaqstannyń gımnastıka federatsııasynyń qazirgi prezıdenti, «Qazaqstan Halyq banki» AQ basqarmasynyń tóraǵasy Úmit Shaıahmetova qaıta saılandy. Federatsııa músheleri bul týraly sheshimdi biraýyzdan shyǵardy.
Qazaqstannyń gımnastıka federatsııasy 1992 jyldan beri jumys isteýde, Halyqaralyq gımnastıka federatsııasynyń jáne Azııalyq gımnastıkalyq odaǵynyń múshesi. Federatsııanyń quramyna Qazaqstannyń 13 aımaǵynan sporttyq gımnastıka, kórkem gımnastıka, sporttyq akrobatıka, akrobattyq jolaqta jáne batýtta sekirýden akkredıttelgen 16 aımaqtyq sporttyq federatsııa kirip otyr. Gımnastıka federatsııasy 10 myńnan astam sportshy gımnastqa jetekshilik etedi.
