Ý.Qaısarovtyń lıngvıstıkalyq komıssııanyń synynan óte almaýynda eshqandaı da saıası astar joq- M.Joldasbekov
ANA. 9 aqpan. QazAqparat /Aıdar Ospanalıev/ - Ýálıhan Qaısarovtyń Qazaqstan Respýblıkasynyń Prezıdenttigine kandıdat retinde Prezıdenttike kandıdattardyń memlekettik tildi erkin meńgerýin anyqtaý jónindegi lıngvıstıkalyq komıssııanyń synynan óte almaýynda eshqandaı da saıası astar joq.
Bul týraly búgin Ortalyq saılaý komıssııasynyń otyrysynda lıngvıstıkalyq komıssııa tóraǵasy Myrzataı Joldasbekov málim etti.
Budan buryn habarlaǵanymyzdaı, Ortalyq saılaý komıssııasy Ýálıhan Qaısarovty Qazaqstan Respýblıkasynyń Prezıdenttigine kandıdat retinde Konstıtýtsııa men «QR Saılaý týraly» konstıtýtsııalyq zań talaptaryna sáıkes emes dep taýyp, tıisti qaýly qabyldaǵan bolatyn. «Keshe atalmysh kandıdat Prezıdenttikke kandıdattardyń memlekettik tildi meńgerýin anyqtaý jónindegi lıngvıstıkalyq komıssııasynyń synynan óte almady. Sol sebepti kandıdat Ý.Qaısarov Konstıtýtsııa men «QR Saılaý týraly» konstıtýtsııalyq zańnyń talaptaryna sáıkes emes dep tanyldy», - dep málimdegen bolatyn búgin OSK-nyń hatshysy Baqyt Meldeshov.
OSK-niń búgingi otyrysynda osy máselege qatysty túsinikteme bergen Ortalyq saılaý komıssııasynyń tóraǵasy Qýandyq Turǵanqulovtyń aıtýynsha, Ýálıhan Qaısarov lıngvıstıkalyq komıssııaǵa emtıhan tapsyra almaǵan soń aqparat quraldarynyń ókilderi bunyń saıası astary bar ekendigin aıtyp, sondyqtan komıssııa sheshiminiń durys emes ekendigin aıtyp jar salǵan.
Al óz kezeginde M.Joldasbekov lıngvıstıkalyq komıssııa sheshiminiń eshqandaı da tapsyrys emes ekenin jáne onyń taza memlekettik tilge degen talaptardyń aıasynda qabyldanǵanyn atap ótti. «Qazaqstan sııaqty eldi basqaratyn adam memlekettik tildi tolyq meńgerýi kerek. Ol saıasattan da, ekonomıkadan da halyqaralyq qatynastan da úlgili adam bolýy qajet. Jalpy Prezıdent bolatyn adamdarǵa qoıylatyn talaptar bizdiń Konstıtýtsııada aıqyndalǵan. Sonyń biri - Prezıdenttikke kandıdat memlekettik tildi erkin meńgerýi kerek. Bizdiń komıssııa osy mindet aıasynda jumys istedi. Komıssııa quramynda fılologııa salasyndaǵy elimizge tanymal ǵalymdar bar. Sondyqtan komıssııanyń Memleket basshysy bolam degen kez-kelgen adamnyń memlekettik tilge qatysty múmkindigin anyqtaýǵa qaýqary tolyq jetedi»,-dedi M. Joldasbekov.
Onyń aıtýynsha, memlekettik tilge qatysty synaq úsh kezeńnen ótti. Osy úsh kezeńniń birinshisinen Ý.Qaısarov 28 qate jiberdi. Ekinshi mátin oqýda da kóptegen qatelikter ketti. «Prezıdentikke kandıdat erkin sóıleı bilýi kerek. Al Ý.Qaısarov «Halyqaralyq yntymaqtastyq aıasyndaǵy Qazaqstan» degen taqyrypqa sóıledi. Bul óte jaqsy taqyryp. Soǵan qaramastan Ý.Qaısarov taqyryptan aýytqyp ketti. Osyndaı máselelerdiń barlyǵyn tolyqtaı qarap, saraptaı kele ol qazaq tilin erkin meńgermegen degen qorytyndyǵa keldik»,-dedi M.Joldasbekov.
