U. Qarabalın: Tórtinshi munaı óńdeý zaýytyn salýdy qazirden oılaý kerek

ASTANA. QazAqparat - 2023 jyldan keıin Qazaqstanda dızeldik otyn óndirisi tapshy bola bastaıdy. Sondyqtan da, tórtinshi munaı óńdeý zaýytynyń qurylysyn qazirden oılaý kerekpiz. Búgin Ortalyq kommýnıkatsııalar qyzmetinde ótken brıfıng barysynda Energetıka birinshi vıtse-mınıstri Uzaqbaı Qarabalın osylaı málimdedi.

Sóz arasynda vıtse-mınıstr Qazaqstandaǵy úsh zaýyttyń qaıta jańǵyrtý jumystary aıaqtalyp, tórtinshi jańa munaı óńdeý zaýyty iske qosylǵannan bastap elimizde benzınge ishki suranys tolyq qamtamasyz etiletinin atap ótti. Osyǵan baılanysty Úkimet tórtinshi zaýyttyń qurylysy týraly máseleni qarastyrýda.

«2017 jyldan keıin bizdiń elimizde úsh MÓZ (munaı óńdeý zaýyty) jańǵyrtý esebinen ishki naryqtyń suranysy tolyq jabylady. Alaıda 2023 jylǵa qaraı dızeldik otyn tapshylyǵy baıqalýy boljanady, bul shamamen 1-1,5 mln. tonnany quraýy múmkin. Osynyń aldyn alý úshin qazirdiń ózinde jańa zaýyt týraly oılanýymyz kerek. Bul rette zaýyttyń ornalasatyn ornyn aıqyndap, ınvestorlar tabý, jobanyń ekonomıkalyq tıimdiligin qamtamasyz etýge tıispiz», - dedi U. Qarabalın.

Onyń sózine qaraǵanda, tórtinshi zaýytqa qatysty qazirgi tańda ákimdikter tarapynan da, túrli kompanııalar tarapynan da kóptegen usynystar túsýde. Ondaı usynystar arnaıy komıssııanyń qaraýynda jatyr. «Bul máselede eń birinshi kezekte taza ekonomıkalyq qadam basymdyqqa ıe bolyp tabylady, sosyn logıstıka, munaımen qamtylý, sondaıaq óndirilgen munaı ónimderiniń eksportyn qamtamasyz etý máseleleri de ózekti bolyp tabylady», - dedi Uzaqbaı Qarabalın.

Eske sala keteıik, búgingi tańda elimizde tórtinshi munaı óńdeý zaýytynyń qurylysy keńinen talqylanýda. Bul máseleni Elbasy Nursultan Nazarbaev kótergen bolatyn.