U.Qarabalın: Otandyq munaıdy qaıta óńdeý qýatyn 2030 jylǵa qaraı 20 mln. tonnaǵa jetkizý kózdelýde

ASTANA. QazAqparat - Otandyq munaıdy qaıta óńdeý qýatyn 2030 jylǵa qaraı 20 mln. tonnaǵa jetkizý kózdelýde. Bul týraly QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Munaı jáne gaz mınıstri Uzaqbaı Qarabalın málim etti.

«Elimizdiń qaıta óńdeý salasyna erekshe nazar aýdarylatyn bolady. Otandyq munaıdy qaıta óńdeý qýatyn 2030 jylǵa qaraı 20 mln. tonnaǵa jetkizý kózdelýde. Búginde ol kórsetkish jylyna 14 mln. tonnany qurap otyr», - dedi mınıstr.

Onyń atap ótýinshe, elimizde shyǵarylatyn munaı ónimderin halyqaralyq standarttarǵa sáıkestendirý basty mindetterdiń biri. Sondyqtan da qazirgi ýaqytta jańǵyrtý jumystary júrgizilip jatqan zaýyttarda munaıdy qaıta óńdeý 90 paıyzǵa jetkiziletin bolady.

«Bul rettegi mańyzdy jobalardyń biri Shymkent munaı óńdeý zaýyty keshenin odan ary keńeıtý bolmaq. Sonymen qatar otandyq zaýyttar úshin qor bazasyna, ásirese, Eýrazııalyq ekonomıkalyq odaq jaǵdaıynda munaı ónimderiniń básekelesti qazaqstandyq naryqta qyzmet etý máselesine basa nazar aýdarý qajet», - dedi U.Qarabalın.