U. Qarabalın: Osy aıda Qazaqstanǵa qajetti benzın kólemi jetkiziledi
«Úkimettiń benzınniń baǵasyna qatysty jasaǵan sońǵy sheshiminiń arqasynda elimizge benzınniń jetkizilimi jaqsardy. Ony biz birinshi kúnnen baıqap otyrmyz. Qyrkúıektiń basynan beri 22 myń tonna benzın Qazaqstanǵan jetkizilgen. 11 myń tonnadaı búginde jolda kele jatyr. Sonymen qatar 80 myń tonnany alý úshin tıisti sharttarǵa qol qoıyldy. Endi qyrkúıek aıynyń ishinde onyń kólemi 110 myń tonnaǵa deıin jetedi dep eseptep otyrmyz», - dedi U. Qarabalın.
Osy oraıda ol bul sharalardyń nátıjesinde aǵymdaǵy aıda qajetti benzın kólemi tolyq qamtamasyz etiletindigin atap ótti.
Esterińizge sala keteıik, qyrkúıektiń tórtinde Ortalyq kommýnıkatsııalar qyzmetindegi baspasóz máslıhatynda QR Premer-Mınıstriniń birinshi orynbasary Baqytjan Saǵyntaev Úkimet Aı-92/93 benzıni baǵasyn memlekettik retteýden bas tartqandyǵyn habarlaǵan bolatyn. B. Saǵyntaevtyń aıtýynsha, Úkimet benzın tapshylyǵyn boldyrmas úshin Aı-92/93 benzıni baǵasyna memlekettik retteýden bas tartyp otyr. Qazaqstan buryndary Reseıden jetpeıtin benzındi 97 teńgeden alǵan edi, ıaǵnı 1 rýbl - 2,95 teńge baǵamy boıynsha. Búginde teńgeniń erkin baǵamy aıasynda benzın 120 teńgeden satyp alynyp, 108 teńgeden satylýda. «Sáıkesinshe, shyǵynmen eshkim de jumys istegisi kelmeıdi. Eger osylaı jalǵassa, jaqyn arada, qyrkúıektiń aıaǵyna qaraı benzın tapshylyǵy týyndaıdy», - dedi ol.
Onyń sózine qaraǵanda, elimizdegi óndiris pen tutyný balansynda Aı-92/93 benzınin úsh munaı zaýytynda óndirý kólemi 2,1 mln. tonna, al tutyný deńgeıi 3,2 mln. tonnany qurap otyr. ıAǵnı, 1,1 mln. tonna kóleminde jetispeýshilik bar. Bul qajettiliktiń negizgi kólemi Reseıden jetkizilýde.
