U. Qarabalın: Qazaqstan Azııa óńirin energetıkalyq qaýipsizdikpen qamtamasyz etýdegi óz múmkindikterin nyǵaıtýǵa nıetti
Búgin Astanadaǵy «KAZENERGY-2015» onynshy Eýrazııalyq forýmy aıasyndaǵy konferentsııada Energetıka vıtse-mınıstri Uzaqbaı Qarabalın osylaı málimdedi. Eske salaıyq, forým aıasyndaǵy munaı-gaz konferentsııasy «Eýrazııa óńirindegi energııa qaýipsizdigi: jańa yntymaqtastyq mehanızmi» taqyrybynda ótip jatyr.
Jıyn barysynda sóz sóılegen Energetıka mınıstriniń orynbasary Uzaqbaı Qarabalın Qazaqstannyń munaı-gaz salasyndaǵy Qytaımen áriptestik máselelerine de nazar aýdarǵan bolatyn.
Onyń aıtýynsha, Qazaqstan men Qytaıdyń «Jibek joly» ekonomıkalyq beldeýi boıynsha 3 asa mańyzdy aspektisi bar. «Birinshi bul «CNPC» kompanııasy qyzyǵýshylyq tanytyp otyrǵan «Eýrazııa» jobasyn júzege asyrý. Bul joba Kaspıı mańyn tereń zertteýge baǵyttalyp, ǵylymı-zertteýlerdi, tehnologııalyq jáne qoldanbaly zertteýlerdiń keń aýqymyn qamtıdy. Bizdiń pikirimizshe, «Eýrazııa» jobasy álemdik geologııa ǵylymynyń damýyna tyń serpin berip, jańa úles qosýy múmkin. Osynyń arqasynda Qazaqstan aldaǵy uzaqmerzimdi keleshekte tutastaı Azııa óńirin energetıkalyq qaýipsizdikpen qamtamasyz etýde óz múmkindikterin nyǵaıtýǵa múddeli»,- dedi Uzaqbaı Qarabalın.
Budan bólek, vıtse-mınıstrdiń aıtýynsha, Qazaqstan munaı óndirý ádisi boıynsha Qytaımen aradaǵy zertteý quramdastaryn damytýǵa da múddeli. «Memleket basshysy munaı óndirýdiń jalpy koeffıtsıentin ulǵaıtý jóninde tapsyrma bergen bolatyn. Osy rette qytaılyq kompanııalardyń munaı óndirýdi ulǵaıtý protsesin ǵylymı-zertteýmen qamtamasyz etý máselesine óte úlken jaýapkershilikpen qaraıtyny bizge málim. Osyǵan baılanysty atalǵan másele boıynsha Qazaqstannyń múmkindikterin arttyrý boıynsha Qytaıdyń bedeldi ortalyqtarymen syndarly yntymaqtastyq ornatamyz degen nıettemiz», - dedi U.Qarabalın.