U.Qarabalın benzın baǵasynyń kóterilý sebebin atady

ASTANA. QazAqparat - Búgin QR Parlamenti Májilisiniń jalpy otyrysynda depýtattardyń saýalyna oraı QR Energetıka vıtse-mınıstri Uzaqbaı Qarabalın benzın baǵasynyń kóterilý sebebin túsindirdi.

«Aǵymdaǵy jyldyń birinshi toqsanynda reseılik janarmaıdy tıimdi tasymaldaýdyń nátıjesinde otandyq munaı óńdeý zaýyttary jumysynyń irkilýi baıqaldy. Bul óndiristiń qysqarýyna ákeldi. Máselen, AI 92 benzıni bizde 400 myń tonnadan astam, dızel otyny 1 mln. tonnadan astam kólemde jınaqtalyp qaldy. Osyǵan oraı mınıstrlik besinshi naýryz ben jıyrmasynshy sáýir aralyǵynda Reseıden benzın men dızel otynyn tasymaldaýǵa ýaqytsha shekteý engizdi», - dedi ol.

Onyń atap ótýinshe, osydan keıin ahýal turaqtalyp, reseılik janarmaı tasymaldaýdy shekteý boıynsha qabyldanǵan sharalar otandyq zaýyttardyń qaıta jumys isteýine, munaı óńdeý kóleminiń tómendeýine jol bermeýge jol ashqan. Qazirgi ýaqytta Reseıden benzın tasymaldaýǵa shekteý alyndy. Al dızel otynyna qoıylǵan shekteý 20 maýsymǵa deıin jalǵasady.

«Ózderińizde bilesizder, ótken jyly, ótken qysta janarmaıdyń áleýmettik túrleriniń baǵasy úsh márte tómendetilgen bolatyn. Odan keıin ortaq eýrazııalyq naryqta shekaranyń ashyq bolýy elden janarmaıdyń syrtqa aǵylýyna jol bermeý úshin sharalar qabyldaýdy qajet etti», -dedi U.Qarabalın.

Onyń atap ótýinshe, munaı baǵasyna baılanysty jeke bólshek saýda baǵasyn esepteýdiń qoldanystaǵy erejesine sáıkes benzın quny 108 teńge kóleminde belgilenip otyr.

«Osylaısha, munaı óńdeý zaýyttary jumysynyń turaqtylyǵy qamtamasyz etildi. Arzan qazaqstandyq janarmaıdyń kórshiles elderge aǵylýyna jol berilmedi», - dedi ol.