Ý.ben Ladenniń kózi joıyldy
ASTANA. 2 mamyr. QazAqparat - «Ál-Kaıeda» lańkestik jelisiniń jetekshisi, «№1 lańkes» Ýsama ben Laden amerıkandyq arnaıy qyzmetterdiń Pákistanda júrgizgen operatsııasy barysynda óltirildi.
Bul jańalyqty dúısenbi kúni jasaǵan shuǵyl teleúndeýinde AQSh Prezıdenti Barak Obama jarııa etti, dep habarlaıdy RBK agenttigi.
Operatsııa Islamadtyń irgesinde bolǵan. Ý.ben Laden basyna tıgen oqtan qaza bolǵan. Ony tek syrtqy kelbeti boıynsha anyqtap otyr. Qazir DNK testi júrgizilip jatyr, zertteýdiń nátıjesi birneshe kúnnen keıin daıyn bolady. Bul týraly amerıkandyq barlaýdyń joǵary laýazymdy ókilderiniń biri anonımdi túrde habarlaǵan. Buǵan deıin, lańkestik tulǵasy DNK testimen qýattaldy degen aqparat taratylǵan bolatyn.
"Degenmen, amerıkandyq telearnalar «Ál-Kaıeda» basshysy ıslam ádet-ǵurpyna sáıkes jerlengenin habarlap otyr. Onyń kózi joıylǵannan keıin, denesi Aýǵanstanǵa jetkizilip, sol jerde jerlengen", - dep habarlaıdy Reuters agenttigi.
Basqa derekter boıynsha, lańkes Saýd Arabstanynda jerlengen. Ben Ladenniń jerlengen jerine qatysty naqty aqparat ázirge joq. Buǵan deıin B.Obama lańkestiń denesi amerıkan ókimetiniń qolynda ekenin ǵana habarlaǵan bolatyn.
Sarapshylar, onyń naqty jerlengen jeriniń jarııalaný yqtımaldyǵyna kúmán keltirýde, sebebi arnaıy qyzmetter, onyń zıraty ıslam radıkalshylary minájat etetin orynǵa aınalǵanyn qalamaıtyny anyq.
«№1 lańkes» 1957 jyly týǵan. Jıdda ýnıversıtetiniń ekonomıka jáne menedjmen fakýltetin támamdaǵan. 1980 jyldary Aýǵanstanda Keńes armııasyna qarsy soǵysqan oǵan bul kúreste TsRÝ aqshalaı qoldaý kórsetken. 1996 jyly ol Qurama Shtattardy jermen jeksen etý týraly sheshimin jarııa etken edi. Oǵan 11 qyrkúıektegi Nıý-Iork pen Vashıngtondaǵy lańkestik áreketterdi, Saýd Arabstany, Iemen, Aýǵanstan, Irak, Mysyr, Kenııa, Tanzanııa elderinde amerıkan azamattaryna qarsy shabýyldar uıymdastyrdy degen aıyptar taǵylyp otyr. Túrli derekter boıynsha, ben Laden Sheshenstandaǵy, Kosovodaǵy, Iraktaǵy, Aýǵanstan men Fılıppındegi, basqa da elderdegi sodyrlarǵa kómek kórsetip kelgen.
