Jetkiliktilik shegi artqan soń zeınetaqy jınaǵyn saqtandyrý kompanııasyna aýdarý eki ese ósti
ASTANA. KAZINFORM – Turǵyn úı jaǵdaıyn jaqsartý men emdelýge arnalǵan zeınetaqy jınaqtaryn paıdalaný úshin belgilengen eń tómengi jetkiliktilik shegi (TJSh) kóterilgennen keıin qazaqstandyqtar saqtandyrý kompanııalaryna zeınetaqy annýıtetin rásimdeý maqsatynda qarajat aýdarýǵa aıtarlyqtaı jıi júgine bastaǵan.
Biryńǵaı jınaqtaýshy zeınetaqy qorynyń (BJZQ) málimetinshe, bıyl 1 qańtar men 1 maýsym aralyǵynda saqtandyrý uıymdaryna zeınetaqy jınaqtaryn aýdarý boıynsha 45 843 tólem oryndalǵan. Aýdarylǵan qarajattyń jalpy kólemi 199,91 mlrd teńge. Oǵan qosa, TJSh shegi kóterilgennen keıin bul úrdis aıtarlyqtaı jedeldegen.
– TJSh kóterilgennen keıingi alǵashqy on kúnde, ıaǵnı 5-15 maýsym aralyǵynda, 6 345 tólem júzege asyrylyp, olardyń jalpy somasy 34,02 mlrd teńgeni qurady. Salystyrý úshin aıtsaq, ótken aıdyń dál osy kezeńinde, ıaǵnı 5–15 mamyr aralyǵynda – 2 984 tólem oryndalyp, jalpy kólemi 12,07 mlrd teńge bolǵan, – dep habarlady BJZQ Kazinform saýalyna bergen jaýabynda.
BJZQ málimetinshe, 2024 jyly qor saqtandyrý kompanııalaryna zeınetaqy jınaqtaryn aýdarý týraly 62 592 ótinishti oryndap, jalpy 394,5 mlrd teńgeden astam qarajat aýdarǵan. Al byltyr bul kórsetkish 91 238 ótinishke deıin ósip, aýdarylǵan qarajat kólemi shamamen 427 mlrd teńge boldy.
Sonymen qatar qor mamandarynyń aıtýynsha, zeınetaqy annýıtetine degen qyzyǵýshylyq artqanymen, qazaqstandyqtardyń bul tetik týraly habardarlyq deńgeıi áli de salystyrmaly túrde tómen.
– BJZQ táýelsiz zertteý kompanııasymen birlesip júrgizgen jyl saıynǵy áleýmettik zertteý nátıjesine sáıkes, 2025 jyly saýalnamaǵa qatysýshylardyń tek 29%-y ǵana belgili bir jasqa jetip, jetkilikti mólsherde jınaǵy bolǵan jaǵdaıda zeınetaqy jınaqtaryn saqtandyrý kompanııasyna aýdarýǵa bolatynyn durys kórsetken. Salystyrmaly túrde alǵanda, 2021 jyly bul kórsetkish shamamen 22% bolǵan, – dep málimdedi qor.
Sonymen qatar saýalnamaǵa qatysýshylardyń tek 2,6%-y ǵana saqtandyrý tólemderin zeınetaqymen qamsyzdandyrýdyń negizgi kózderiniń biri retinde ataǵan. Al tórt jyl buryn bul kórsetkish 1,03% bolǵan.
Zeınetaqy annýıteti – bul salymshy men saqtandyrý uıymy arasynda jasalatyn kelisimshart. Ol azamatqa óziniń zeınetaqy jınaqtary esebinen ómir boıy aı saıynǵy tólemder alýǵa múmkindik beredi. Búginde qazaqstandyqtar zeınetaqy tólemderin alýdyń birneshe nusqasynyń birin tańdaı alady:
– zeınetaqy jınaqtary tolyq taýsylǵanǵa deıin tólemderdi belgilengen keste boıynsha tikeleı BJZQ-dan alý;
– qarajattyń bir bóligin nemese tolyq kólemin saqtandyrý kompanııasyna aýdaryp, ómir boıy tólenetin aı saıynǵy tólemderdi alý;
– eki tetikti qatar qoldanatyn aralas tásildi tańdaý.
Saqtandyrý uıymy arqyly tólemderdi alý úshin zeınetaqy annýıteti sharty jasalady.
Aıta keteıik, Astanada zeınetaqy men járdemaqyny rásimdeý jeńildedi.
Sonymen qatar Eńbek mınıstrligi zeınetaqy jınaqtaryna memlekettik kepildikke qatysty túsinikteme berdi.
