TJ mınıstri byltyrǵy sý tasqynynyń negizgi sebepterin atady

ASTANA. KAZINFORM — Tótenshe jaǵdaılar mınıstri Shyńǵys Árinov Senatta ótken Úkimet saǵatynda ótken jylǵy kóktemdegi sý tasqynynyń sebebi men saldaryn túsindirdi.

Jalpy, sý tasqyny saldarynan elimizdiń 12 óńiri zardap shekti, 200-den astam eldi mekenniń tynys-tirshiligi men ınfraqurylymy buzyldy.

Oǵan qosa, 11 myńnan astam turǵyn úıdi, 25 myńnan astam saıajaılar men ýchaskelerdi, 453 ǵımaratty sý basyp, 150 avtojol ýchaskeleri men 11 kópirdi sý shaıdy. 12 myńnan astam mal shyǵyny tirkeldi.

— Sý tasqynynyń negizgi sebebi — qys pen kóktem mezgilindegi gıdrometeorologııalyq jaǵdaıdyń kúrt ózgerýi boldy. Kún sýyta bastaǵanda topyraqtyń joǵary ylǵaldylyǵy onyń betki qabatynda kóp ylǵal jınalyp, qatýyna ákeldi. Al qys kezinde jylymyq bolǵanda topyraq pen qalyń qar jamylǵysynyń betinde muz qabyqshasy paıda boldy. Kóktemniń basynda qar tez erip, aýa temperatýrasy joǵarylap, jaýyn-shashyn kóp mólsherde tústi, — dedi TJ mınıstri.

Qardyń tez erýi, topyraqtyń ylǵaldylyǵy, qar jamylǵysyndaǵy sýdyń edáýir mólsheri anomaldi sý tasqynyna ákep soqty.

Sondaı-aq, Reseı Federatsııasynyń Irıklın sý qoımasy tolyp, sýdy birden artyq mólsherde tókkendikten, Jaıyq ózeni arnasynan shyǵyp, elimizdiń batys óńirlerindegi jaǵdaıdy qıyndatty.

Aqtóbe jáne Qarǵaly sý qoımalarynyń tolýyna baılanysty Qarǵaly jáne Elek ózenderine sý tógildi. Onyń saldarynan Aqtóbe qalasyndaǵy saıajaı ýchaskelerin sý basty.

— Óńirlerdiń mundaı aýqymdy sý tasqynyna jetkiliksiz daıyndyǵy jáne sý tasqynyna qarsy is-sharalardy ýaqytyly iske asyrmaýy áser etti. Memleket basshysy jekelegen laýazymdy tulǵalarǵa qatysty tártiptik sharalar qabyldady. Qutqarý operatsııalar kúndiz-túni júzege asyryldy. Bul úshin buryn-sońdy bolmaǵan áýe avıatsııasy tartyldy. Temir jol arqyly sý tasqyny kúrdeli óńirlerge arnaıy jáne ınjenerlik tehnıka jappaı tasymaldandy. Jalpy 120 myńnan astam adam qutqaryldy, 35 mıllıon tekshe metrden astam sý soryldy, — dep túsindirdi sala mınıstri.

Buǵan deıin Senat tóraǵasynyń orynbasary Jaqyp Asanov jyl saıyn tasqynnyń sebebimen emes, tek saldarymen kúrese bersek, eshqandaı bıýdjettiń aqshasy jetpeıtinin aıtqan edi.

Aıta keteıik, elimizdiń 4 mınıstrligi birlesip, sý tasqynyn boljaýǵa jáne modeldeýge múmkindik beretin Tasqyn aqparattyq júıesin ázirleýde. Tasqyn júıesi boıynsha alǵashqy sý tasqyny boljamy aqpan aıynda jarııalanady.