TJM: jazǵy demalys kezinde balalardyń qaýipsizdigi basty nazarda bolady

ASTANA. KAZINFORM — Qazaqstannyń Tótenshe jaǵdaılar mınıstrligi jaz mezgili qarsańynda balalardyń qaýipsizdigin qamtamasyz etýge baǵyttalǵan keshendi sharalardy júzege asyryp jatyr. Bul týraly Ortalyq kommýnıkatsııalar qyzmeti alańynda ótken dóńgelek ústelde QR TJM Órtke qarsy qyzmet komıtetiniń tóraǵasy Erlan Tóregeldıev málim etti.

— Ár óńirde profılaktıkalyq, úgit-nasıhat jumystary júıeli túrde júrgizilip jatyr. Bul jumysqa ata-analar, balalar, mektepke deıingi uıymdar tartylyp otyr. Barlyq jastaǵy balalar úshin TJM bólimshelerine ekskýrsııalar uıymdastyrylady. Jumys jaz aılarynda da toqtatylmaıdy, — dedi komıtet tóraǵasy.

Onyń aıtýynsha, qazirgi tańda elimiz boıynsha bilim berý uıymdarynda 2500-den astam «Jas qutqarýshy» úıirmesi men kadet synyptary jumys isteıdi. Bul úıirmeler óskeleń urpaqqa patrıottyq tárbıe berip, tótenshe jaǵdaılar kezindegi is-qımylǵa úıretedi.

— Maýsym aıynda Kókshetaý qalasynda jyl saıynǵy respýblıkalyq «Jas qutqarýshy» jarysy ótedi. Onyń qorytyndysy boıynsha úzdik komandalar halyqaralyq deńgeıdegi jarystarǵa qatysýǵa múmkindik alady, — dep tolyqtyrdy Erlan Tóregeldıev.

Sonymen qatar 1 maýsym — Halyqaralyq balalardy qorǵaý kúni aıasynda «Balalardyń qaýipsizdigi — basty nazarda» atty respýblıkalyq is-shara uıymdastyrylýda. Bul bastama qaýipsiz demalysty qamtamasyz etýge jáne balalardyń ómiri men densaýlyǵyn qorǵaýǵa baǵyttalǵan.

Aıta keteıik, buǵan deıin balalar men jasóspirimder qozǵalysyn damytýdyń jańa tásilderi qabyldanatynyn jazǵanbyz.